Maduro chama "franquista" e "fascista" a Alberto Núñez Feijóo

O mandatario de Venezuela Nicolás Maduro chamou este luns "franquista" e "fascista" ao presidente do Partido Popular de España Alberto Núñez Feijóo e vinculouno novamente con presuntos actos de corrupción.

"Es un franquista, un fascista que desborda corrupción e babexa cada vez que fala de Venezuela", expresou no seu programa semanal de televisión o líder chavista, que reiterou as súas críticas polas celebracións en España do Día da Hispanidade.

"Núñez Feijóo, nós somos a civilización, vostedes son a barbarie, foron, son e serán a barbarie. Onte foron o colonialismo, hoxe son o fascismo, o franquismo son vostedes", proseguiu.

Maduro estendeu estes adxectivos á presidenta da Comunidade de Madrid Isabel Díaz Ayuso e ao presidente do partido VOX Santiago Abascal, e tachounos tamén de "bárbaros" e "asasinos".

Ademais, considerou "unha ofensa" que Feijóo declarase que se sente como un venezolano máis, durante un acto en apoio ao líder opositor Edmundo González Urrutia, quen se exiliou en España logo de denunciar fraude nas presidenciais do 28 de xullo, nas que Maduro foi proclamado gañador.

"Nin que nazas mil veces máis poderás dicir que es venezolano, xamais, porque ser venezolano é ser bolivariano, é representar unha honra, unha historia", remarcou. A finais de setembro, o mandatario venezolano tachou o líder do PP de "falanxista" e "ladrón", cualificativos que foron criticados polo ministro de Relacións Exteriores de España José Manuel Albares, quen considerou que se trata de "inxurias e calumnias".