Microsoft estima que o erro de Crowdstrike afectou a 8,5 millóns de dispositivos
Microsoft estima que o erro de Crowdstrike afectou a 8,5 millóns de dispositivos
O xigante tecnolóxico avoga pola "colaboración" do sector para evitar e resolver rápido casos similares
![Un negocio en Camberra (Australia) pechado polo erro informático. Lukas Coch via REUTERS](https://img-g24-crtvg.flumotion.com/prog24/2024/20240721/Microsoft.jpg)
O xigante tecnolóxico Microsoft estima que o erro da empresa de ciberseguridade Crowdstrike afectou a 8,5 millóns de dispositivos co sistema operativo Windows e avogou pola "colaboración" do sector para evitar e resolver rápido casos similares.
Un erro nunha actualización dun software de CrowdStrike para Windows 10 deixou equipos de todo o mundo atrancados na chamada "pantalla azul da morte", segundo explica en X George Kurtz, director xeral da empresa, dando lugar ao "maior apagamento informático" da historia.
O vicepresidente de seguridade de sistemas operativos e empresas de Microsoft, David Weston, asegura no blog corporativo que os 8,5 millóns de dispositivos Windows afectados supoñen "menos do 1 % de todas as máquinas Windows" pero pon de relevo as graves consecuencias.
"Aínda que a porcentaxe é pequena, os amplos impactos económicos e sociais reflicten o uso de Crowdstrike por empresas que xestionan moitos servizos críticos".
Nese sentido, considera o "apagamento" un "recordatorio" da importancia de que as tecnolóxicas prioricen o uso de mecanismos de seguridade e de "recuperación de desastres" nas súas operacións, e que traballen xuntas.
"Como vimos nos dous últimos días, aprendemos, recuperámonos e avanzamos máis efectivamente cando colaboramos e traballamos xuntos. Apreciamos a cooperación e colaboración do noso sector enteiro e seguiremos actualizando con aprendizaxes e os seguintes pasos".
Westont explica que, dado o impacto do fallo de Crowdstrike, Microsoft estivo colaborando con esa firma e cos seus rivais do sector da nube híbrida, Google e Amazon, para resolvelo, ademais de poñer á disposición da clientela centos de empregados para ofrecer axuda técnica.
"Crowdstrike axudounos a desenvolver unha solución escalable que axudará á infraestrutura de Microsoft Azure (sistema da nube) a acelerar un arranxo para a actualización defectuosa", agregou.
O incidente, ocorrido tras o lanzamento da actualización informática o 18 de xullo, afectou a usuarios e empresas de sectores esenciais en todo o mundo, como a banca, a aeronáutica, os medios de comunicación ou a saúde, que seguen recuperándose.