Muface: á terceira vai a vencida, por Santiago Calvo

A nova licitación do seguro de saúde para funcionarios en España supón o desenlace dunha crise prolongada que afectou a máis de 1,5 millóns de persoas, entre funcionarios e os seus familiares. O protagonista desta historia é Muface, a Mutualidade Xeral de Funcionarios Civís do Estado, que xestiona a asistencia sanitaria deste colectivo a través de convenios con aseguradoras privadas.

Muface ofrece cobertura sanitaria a través dun sistema de mutualismo administrativo no que as aseguradoras reciben unha prima mensual por cada asegurado. O problema xorde cando as primas non cobren os custos reais da asistencia sanitaria. Para contextualizar, o gasto sanitario público por habitante en España é de 1.927 euros anuais, mentres que a prima media de Muface apenas alcanzaba os 1.008 euros, xerando un desfase financeiro insostible para as compañías aseguradoras.

Nos últimos meses, o proceso de licitación estivo marcado pola incerteza. O Goberno lanzou ata tres intentos para pechar un novo concerto, tras o fracaso das dúas primeiras convocatorias. As aseguradoras, como Adeslas, Asisa e DKV, rexeitaron inicialmente participar debido á insuficiencia das primas propostas. O primeiro intento ofrecía un incremento do 17,1 %, e o segundo, do 33,5 %, pero ambas foron consideradas insuficientes para cubrir os custos, provocando que quedasen desertos.

Finalmente, o Goberno cedeu ás demandas das aseguradoras e presentou unha nova oferta que contempla un aumento da prima do 41,2 % ao final do terceiro ano do contrato, superando claramente o límite do 33,5 % da proposta anterior. Esta decisión confirma que, tras meses de tensión e incerteza, o Executivo acabou aceptando as condicións que as aseguradoras reclamaban desde o principio.

O novo concerto, vixente entre 2025 e 2027, introduce tamén unha novidade relevante: o incremento da prima será diferenciado por tramos de idade. Así, en 2027, as primas variarán desde os 32,9 euros mensuais para nenos de entre 5 e 14 anos ata os 273,97 euros para maiores de 74 anos. Ademais, inclúe cláusulas de "restablecemento do equilibrio económico-financeiro", permitindo compensacións ás aseguradoras en caso de cambios imprevistos nas condicións económicas.

Este proceso evidenciou a falta de previsión do Goberno, que prolongou innecesariamente unha negociación para acabar aceptando o que as aseguradoras pedían dende un inicio. A consecuencia foi unha incerteza prolongada para millóns de funcionarios e unha demostración da debilidade da planificación na xestión dun servizo esencial.