Nace o Clúster da Construción para crear unha "Galicia sostible e innovadora"
Nace o Clúster da Construción para crear unha "Galicia sostible e innovadora"
Rueda avanza que a Xunta incentivará o sector con contratos de obra pública por máis de 130 millóns
Máis de 40 empresas e catro centros tecnolóxicos acaban de crear o Clúster da Construción de Galicia, que representa máis do 10 % do PIB galego e emprega unhas cen mil persoas. Na presentación desta entidade en Santiago, o presidente da Xunta Alfonso Rueda comprometeu o apoio do Goberno autonómico ao sector para superar retos como a xestión ambiental ou o relevo xeracional.
O Clúster da Construción de Galicia nace como punto de encontro de toda a cadea do sector, dende fabricantes de materiais ata xestoras de residuos ou empresas de loxística. O seu obxectivo é crear xuntos unha Galicia máis sostible e innovadora e aspira a ser un "modelo para o resto de España", segundo defendeu o seu presidente, Diego Vázquez, que lembrou que a industria galega da pedra, a madeira ou o aluminio son referencia en España.
O presidente Alfonso Rueda avanzou que a Xunta prevé licitar nos próximos meses 130 millóns de euros a obra pública e compromete o apoio da Xunta para axudar o sector a superar os retos que ten: minimizar o impacto ambiental, garantir o relevo xeracional ou aumentar a presenza de mulleres na construción.
"Sodes un sector clave no crecemento, creo que esperanzador, da economía galega. Temos os orzamentos máis altos da historia e imos dedicar boa parte deles a seguir construíndo Galicia a través das obras públicas. Hai solidez financeira e estabilidade política, que facilita o mantemento dos contratos que se asinan", explicou o presidente.
