Nova noite de disturbios en Francia contra a reforma das pensións

As protestas contra a reforma das pensións en Francia tamén seguen nas rúas, horas despois do rexeitamento das mocións de censura contra o goberno.

A deste martes foi unha nova noite de manifestacións e disturbios en varias cidades francesas. A cuarta consecutiva.

Só en París hai uns 70 detidos. Ducias de persoas concentráronse xunto ao mausoleo de Napoleón. Entre elas, deputados da Francia Insubmisa, un dos partidos de esquerda que se opón á reforma das pensións.

A policía desaloxou a explanada e posteriormente comezaron a producirse pequenas concentracións. Os manifestantes provocaron incendios aproveitando as montañas de lixo que se acumulan nas rúas tras varias xornadas de folga.

Son moitos os sectores que están en paro, coma os transportes, o ensino ou as refinerías.

E os sindicatos convocaron unha nova xornada de manifestacións para este xoves.