O Arenteiro perdoa e acaba perdendo en Irún por un penalti (1-0)
O equipo de Raúl Jardiel gozou de máis oportunidades e mandou un remate contra o poste xusto antes do gol
O central do equipo galego Yac Diory foi expulsado no segundo tempo
O Arenteiro caeu no Estadium Gal de Irún por 1-0 cun solitario gol de Quique Rivero de penalti. O equipo de Raúl Jardiel gozou das mellores oportunidades e mereceu un mellor resultado. Na primeira parte Baselga e Enol tiveron o tanto para o Arenteiro. O Real Unión pediu un penalti por derrubo na área de Iano Simao.
O segundo tempo comezou do mesmo xeito, cun tiro de Baselga que se estrelou contra o poste. Na seguinte xogada Iano volvía a derrubar a un rival pero o colexiado desta volta si asubiou a pena máxima. Rivero axustou o lanzamento ao poste e marcou o único gol. Tocoulle ao Arenteiro levar a iniciativa pero a expulsión de Yac Diory con media hora por diante deixou as opcións moi minguadas.
