O Baxi Ferrol rencóntrase co triunfo no derbi co Celta (72-63) e achégase ao play off
O Baxi consolida o seu posto de play off a falta de dúas xornadas da Liga regular
O Celta Zorka Femxa está a unha vitoria da permanencia
Na liga feminina, ambientazo na Malata no derbi entre o Baxi Ferrol e o Celta Femxa Zorka. As dúas afeccións cantaron xuntas o noso himno. O conxunto departamental saíu moi forte, cun parcial de 11-0. Non acusaron o esforzo da final da Eurocup. O Celta tardou máis de tres minutos en acadar os primeiros puntos. 28-15 remataron os primeiros dez minutos, marcados polo acerto do Baxi dende a liña de tres, máis dun 50% de éxito, que baixou ao 42% no descanso.
As ferrolás marcharon aos vestiarios dez puntos arriba. Vantaxe que aumentaron no terceiro cuarto, 58-44. O peor destes dez minutos, a lesión de Gala Mestres. Non volveu xogar.
O Celta apertou no derradeiro cuarto, chegou a colocarse a oito puntos a pouco máis de seis minutos para o final. Seis puntos consecutivos de Joiner cortaron a remontada. A vitoria quedou na casa, de pouco serviron os 19 puntos de Haidara, máxima anotadora e MVP do partido con 23 de valoración. No Baxi anotaron todas as que xogaron, agás Jori Davis. Ata Elena Baldonedo disputou os seus primeiros minutos na liga e anotou un tiro libre.
Festa do Baxi, que consolida o seu posto de play off, festa que se trasladou ao banco para que participase Gala Mestres. O Celta queda a unha vitoria da permanencia a dous partidos para o final da fase regular.
Este resultado do Celta provocou a permanencia matemática do Durán Maquinaria Ensino unha temporada máis na Liga Feminina Endesa. O equipo lugués non puido festexalo cun triunfo (perdeu por 64-66 co Joventut) pero as once vitorias colleitadas serán dabondo para seguir na elite do baloncesto feminino.
