O BNG establece o reto de ser a forza que máis medre nas municipais

A voceira nacional do BNG, Ana Pontón, asegura que a súa formación "vai a por todas" e considera que será a forza política que máis medre nas eleccións municipais de maio do vindeiro ano.

A líder nacionalista participou este sábado no Consello Nacional do BNG, o máximo órgano de dirección entre asembleas, que aprobou o programa marco municipal, unha vez avaladas as persoas que serán candidatas nas cidades.

"Demostramos que temos unha alternativa capaz de mellorar a vida das persoas, unha alternativa de calidade que ofrecerlle á cidadanía e, por iso, saímos a por todas nas próximas eleccións municipais, sen poñernos límites, para multiplicar o número de concelleiros e de alcaldes para conseguir máis BNG nos concellos", proclamou.

Durante a súa intervención, defendeu o "modelo" nacionalista nos municipios.

"O da eficacia na xestión, transparente e participativo, igualitario e feminista: un modelo sostible e capaz de xerar dinamismo económico".

Pontón contrapuxo a "capacidade de xestión dos gobernos do BNG, nos que cada euro conta" co "uso caciquil e partidista" do PP, que fai un emprego "discrecional" dos fondos dedicados aos concellos, agudizado co orzamento de 2023, "ano electoral".

A dirixente do BNG aludiu "á durísima situación que vive a maioría social" polo incremento de prezos que en Galicia é "superior" á media, malia ter "salarios e pensións á cola".

Guerra de Ucraína

Criticou a Unión Europea por actuar como "marioneta" dos Estados Unidos na guerra de Ucraína e lamentou que os grandes beneficiarios desta "estratexia de entreguismo son as transnacionais da alimentación e da enerxía, que se forran especulando con bens básicos para a sociedade".

No seu discurso, ademais, reprochou "a falta de alternativas eficaces e valentes" por parte das forzas progresistas e de esquerdas, "incapaces de frear a deterioración das condicións de vida da maioría social".

Mobilización

Ana Pontón animou a cidadanía a mobilizarse e participar na manifestación convocada polo BNG o vindeiro 18 de decembro na capital galega. 

"Para dicir alto e claro que máis que ante unha crise estamos, unha vez máis, ante unha auténtica estafa á xente do común".

Durante o acto, ademais, reivindicou a loita do movemento feminista e animou a non dar "un paso atrás" ante a violencia machista e as "campañas bulo" do PP.

Campaña "impresentable"

Criticou a campaña institucional "impresentable" e "indecente" da Xunta polo 25-N na que "culpabiliza as mulleres da violencia machista e pídelles que renuncien ao seu dereito para ser libres e iguais", asegura.

"O PP debe retirar a campaña de inmediato e desculparse", concluíu.