Os bombardeos israelís contra dúas escolas en Gaza deixan 30 vítimas mortais
Os bombardeos israelís contra dúas escolas en Gaza deixan 30 vítimas mortais
A Defensa Civil palestina asegura que nos centros había persoas refuxiadas
O Exército hebreo acusa a Hamas de usar as instalacións como agocho de terroristas
Un home leva en brazos unha nena ensanguentada. REUTERS TV
Polo menos 30 persoas morreron e decenas quedaron feridas en senllos ataques israelís contra dúas escolas na cidade de Gaza, no norte da Franxa. Segundo a Defensa Civil do enclave palestino, en ambos dous centros refuxiábase poboación desprazada.
"Con estas dúas novas masacres, o exército de ocupación bombardeou e atacou 172 refuxios habitados por decenas de miles de desprazados desde o comezo da guerra xenocida", dixeron as autoridades de Hamas nun comunicado.
O grupo islamita asegura que polo menos 1.040 persoas morreron en ataques israelís contra escolas, refuxio habitual de milleiros de persoas obrigadas a abandonar os seus fogares desde o comezo da guerra.
A Media Lúa Vermella Palestina confirma na súa conta da rede social X o traslado de varias vítimas tras os ataques, xunto a un vídeo que amosa os equipos da organización levando en brazos varios menores ensanguentados.
As forzas armadas israelís confirmaron os bombardeos na escola Hasán Salame, no oeste da capital gazatí, e na escola Naser, tamén na cidade, por tratarse de dous "centros de mando" utilizados polos milicianos palestinos.
Segundo o Exército hebreo, Hamas utilizaba ambos os dous complexos para ocultar os seus combatentes e para planear ataques contra as tropas.
"Antes do ataque tomáronse numerosas medidas para mitigar o risco de danar a civís, incluído o uso de municións precisas, vixilancia e intelixencia adicional", aseguraron.
Este sábado, co mesmo pretexto, o Exército atacou a escola Hamama, tamén na cidade de Gaza, e matou 16 persoas.
Balance de vítimas
Dende o comezo da guerra morreron na Franxa polo menos 39.538 persoas e máis de 91.000 resultaron feridas, segundo as últimas cifras do Ministerio de Sanidade gazatí, controlado por Hamas.
Mentres, a situación humanitaria continúa empeorando nun territorio onde o 90 % da poboación vive desprazada, moitos en fervedoiros de tendas de campaña sen acceso á auga corrente ou electricidade, e onde as enfermidades se entenden mentres pechan clínicas e hospitais.
Vítimas do ataque nunha das escolas gazatís. REUTERS TV
.png)
.png)