O CIS recorta a 3,4 puntos a vantaxe do PSOE sobre o PP, que sería de 6 puntos nas municipais
O CIS recorta a 3,4 puntos a vantaxe do PSOE sobre o PP, que sería de 6 puntos nas municipais
Segundo a sondaxe, o PSOE obtería un 32,9 por cento en estimación de voto nas xerais e o PP, un 29,5 por cento
Sánchez e Feijóo no Senado (EFE/Fernando Alvarado)
O PP recortaría ata os 3,4 puntos a súa distancia co PSOE se hoxe se celebrasen eleccións xerais, segundo o macrobarómetro do Centro de Investigacións Sociolóxicas (CIS) sobre tendencias de voto para as municipais que se difundiu este venres.
Segundo a sondaxe, elaborado entre o 11 e o 26 de outubro pasados a partir de 5.557 entrevistas en case 1.500 municipios de 50 provincias, o PSOE obtería un 32,9 por cento en estimación de voto nas xerais -dúas décimas máis que na anterior sondaxe- e o PP un 29,5 por cento, case un punto máis que no barómetro previo.
A enquisa daríalle un 11,5 % a Unidas Podemos e un 9,3 % a Vox. En canto ao BNG, nunhas xerais obtería o 0,9 % do voto válido emitido, tres décimas máis que o último barómetro do CIS publicado a comezos de outubro e case duplicaría o resultado dos comicios estatais de novembro de 2019, nos que obtivo un escano no Congreso co 0,5 %.
Segundo a enquisa do CIS, que non achega datos de estimación de voto por municipios, o PSOE tamén gañaría as eleccións locais no conxunto de España cun 32,8 por cento fronte ao 26,8 por cento do PP.
