O Congreso do Perú pecha as portas a debater o adianto electoral

O Congreso do Perú pechou as portas a debater no pleno o proxecto de lei que incluía un adianto electoral ao 2023 presentado polo Goberno despois de que este venres unha comisión rexeitara a iniciativa. É a cuarta declinación do lexislativo esta semana.

Once deputados da Comisión de Constitución do Congreso votaron a favor do proxecto, 10 votaron en contra e un abstívose. Como se trata dunha reforma constitucional, debe pasar ao pleno e para iso necesita obter 14 apoios.

O adianto de eleccións xerais, que inclúe comicios presidenciais e parlamentarios, é un dos principais reclamos das protestas antigobernamentais que empezaron a principios de decembro e nas que morreron 69 persoas.

Os congresistas que votaron en contra, situados a ambos os dous lados do espectro político, rexeitan a reforma porque consideran que dana o estado de dereito.

Chamada ao diálogo

Unhas horas antes da última votación, o ministro de Xustiza, José Tello, presentouse ante a comisión para explicar, xunto a autoridades electorais, o devandito proxecto de lei que adianta os comicios ao segundo domingo de outubro de 2023.

O ministro chamou ao diálogo entre os poderes nun momento de excepcionalidade e afirmou que a iniciativa daría "lexitimidade" e "esperanza" á cidadanía.

Tres novas vítimas

Fontes do Alto Comisionado das Nacións Unidas para os Refuxiados (Acnur) no Perú confirmaron a morte de tres migrantes haitianos, entre eles un neno, na localidade de Desaguadero, fronteiriza con Bolivia. Non puideron recibir atención médica polo bloqueo das estradas.

Estas tres persoas súmanse ás outras catro da mesma orixe falecidas polas mesmas causas, e, así, o número total de vítimas polas protestas ascende a 69.