O Dépor Abanca de Fran Alonso comeza a rodar en Granada

O Dépor Abanca de Fran Alonso comeza a rodar mañá sábado 7 de decembro ás 12:00 na Cidade Deportiva do Granada C. F., en partido correspondente á 12ª xornada na Liga F.

O novo técnico deportivista chega ao choque despois de "dúas boas semanas de traballo", tal e como subliñou el mesmo ante os medios de comunicación, posto que a súa incorporación coincidiu cunha parada polos compromisos das seleccións.

"Tiven a oportunidade de traballar estes últimos días con todo o grupo. Estou moi contento. Vexo ao grupo moi motivado, moi unido", engadiu.

O Deportivo suma 6 puntos na táboa, e está situado na 15ª posición.

"A pesar de que os resultados non estaban a chegar a actitude do equipo era moi boa. A unión entre xogadoras, a química era fantástica. Iso é o que vin. É un equipo moi unido, que ten moi claro o obxectivo, que ten confianza a pesar de que non tivo bos resultados ata agora e traballan moi ben, con moito entusiasmo, con moitas ganas de aprender", apuntou Fran Alonso.

Causa baixa para o encontro Inés Pereira, sancionada pola súa expulsión no último partido de liga disputado ante o Sevilla F. C.