O Dépor ABANCA empata pero aumenta súa vantaxe (2-2)
O Dépor ABANCA empata pero aumenta súa vantaxe (2-2)
As brancas e azuis gañaban por dous goles, pero o Osasuna igualou no treito final
A derrota do Español aumenta a diferenza na táboa
O Deportivo ABANCA recibiu en Abegondo a un Osasuna que tivo partido perdido por momentos, pero que rematou empatando e rañando un punto na casa do líder.
As de Irene Ferreras axiña encamiñaron o partido cun gol de Millene no minuto 15, que anticipou varias ocasións para o conxunto local. Ninguén foi quen de ver porta e o conxunto herculino marchou gañando pola mínima ao descanso. Á volta Ana de Teresa puxo o segundo e todo apuntaba a que o Deportivo tiña o partido no peto. Aínda así, o Osasuna recortou diferenzas no 82', para finalmente igualar o encontro no minuto 89. Semellaba un pau duro para o conxunto local, pero a derrota do Español fai bo o punto.
As galegas seguen líderes e aumentan nun punto a súa vantaxe sobre o Español, á falta de catro xornadas para o remate da liga regular.
