O deportivismo recupera o sorriso e confía no ascenso

O deportivismo ferve coma antano. Máis dun milleiro de persoas acompañaron o líder da Primeira Federación a Majadahonda. O club vai camiño dos 20.000 abonados. Cifras inauditas para esta categoría. Nin dous descensos case consecutivos nin a pandemia fixeron estragos na parroquia brancoazul, que volve later aínda con máis forza á calor dun equipo que responde. O fenómeno chama a atención no fútbol español. 

Luis Martínez, presidente da Federación de Peñas do Deportivo: "A afección nunca vai fallar".

Luis Rodríguez Vaz, exadestrador do Deportivo: "Esta afección é tremenda, única en España".

A reforzar ese vencello contribúe un equipo moi seguro de si, que só cedeu dúas derrotas e foi líder en oito das trece xornadas disputadas. A contorna ve elementos de xuízo para o declarar favorito ao ascenso. 

​Luis Rodríguez Vaz: "Por suposto que é favorito, é un equipo equilibrado no cadro de xogadores".

Luis Martínez: "Tense que dar, están funcionando ben as cousas".

​Así e todo, o camiño é longo. Aínda lle quedan vinte e cinco etapas e só o campión obtén o premio gordo do ascenso directo.