O Deportivo Abanca queda ás portas do ascenso á Primeira RFEF
O Deportivo Abanca queda ás portas do ascenso á Primeira RFEF
Logo de boas ocasións, Ainhoa Marín marcou o 1-0 no 88'
As coruñesas precisaban outro gol para mandar a final á prórroga
O Granada aguantou e, logo do 2-0 da ida, ascende á máxima categoría
Galicia seguirá un ano máis sen representación na Primeira División do fútbol feminino. O Deportivo Abanca quedou a un gol do ascenso.
na volta da final, en Abegondo, o equipo coruñés tiña que igualar un 2 a 0 fronte ao Granada para volver á máxima categoría. Tivo oportunidades claras no primeiro tempo, especialmente nas botas de Paula Gutiérrez, Laura Fernández e Cris Martínez. Pero entre a boa actuación de Sandra e o pau mantiveron a igualada inicial.
O Granada tamén tivo ocasións por medio de Naima, que estrelou un balón no traveseiro. Pero o gol resistiuse ata o minuto 88. Ainhoa Marín fixo o único tanto deportivista cun disparo cruzado.
Malia o acoso á desesperada dos últimos minutos, o segundo gol non chegou e o Granada puido festexar o seu ascenso á máxima categoría. O Deportivo de Irene Ferreras xogará un ano máis na segunda categoría.
