O desxeo polar ralentiza a rotación terrestre e afecta ao Tempo Universal Coordinado

O aumento do desxeo polar polo cambio climático está a facer que a Terra vire máis lentamente, o que pode afectar á coordinación da hora mundial e agrega un elemento á discusión sobre como sincronizar os reloxos atómicos coa rotación do planeta.

Un estudo que publica a revista Nature da Universidade de California en San Diego indica que o desxeo en Groenlandia e a Antártida pode reducir, máis rapidamente que antes, a velocidade angular da Terra (a taxa de cambio da posición angular con respecto ao tempo).

Moitas actividades no mundo desde Internet, os móbiles ou os mercados financeiros necesitan unha escala de tempo coherente, normalizada e precisa, a que proporciona o Tempo Universal Coordinado (UTC), respecto á que se calculan todas as outras zonas do mundo. A UTC vén fixada polos reloxos atómicos (TAI), pero tendo en conta o ritmo do ángulo de rotación da Terra.

Para axustar ambos os reloxos foi necesario, en varias ocasións desde 1972, engadir un segundo intercalar, é dicir facer que un minuto en concreto dure 61 segundos. Aínda que un segundo poida parecer pouca cousa, na actualidade son moitas as actividades na Rede que dependen de servidores con tempos moi exactos.

Por iso, o código que leva a conta do tempo en cada computador adoita estar deseñado para manexar ese segundo extra ocasional. Ata o de agora, a rotación da Terra facíase gradualmente máis rápida, de forma que o tempo UT1 corría máis rápido que o dos reloxos atómicos.

Isto implica que cos anos a hora UTC tería que perder un segundo para manter a sincronía, é dicir, o último minuto dun ano determinado tería 59 segundos.

A idoneidade de seguir usando segundos intercalares é algo que aínda discute a comunidade internacional, que tampouco se pronunciou sobre se é necesario intercalar un segundo en sentido negativo. Sería a primeira vez na historia que se aplicaría, polo que será difícil asegurarse de que todos os computadores interconectados do mundo poidan permanecer sincronizados.

A investigación de Agnew, para a que empregou modelos matemáticos, indica que ese segundo negativo podería ser necesario cara a 2026, pero que a influencia do desxeo dos polos na velocidade da Terra fai que se atrase uns tres anos.