Jorge Prado remata no segundo posto en Francia só superado por Seewer
Jorge Prado remata no segundo posto en Francia só superado por Seewer
O lucense foi o líder nas dúas mangas grazas a dúas grandes saídas, pero o suízo chegou con máis forza ao treito final
Grande actuación de Rubén Fernández cun quinto posto
Segundo posto para Jorge Prado no Grande Premio de Francia, só superado por un Seewer que demostrou moito máis poderío físico que o galego no treito final da primeira e segunda mangas. A lesión de Prado semella que vai quedando no esquecemento. Tamén foi unha boa xornada para Rubén Fernández, que acabou no quinto posto.
Grande inicio de primeira manga de Prado. Foi o máis rápido na volta inicial (outro holeshot para el) e mantívose á fronte ata que quedaba unha volta e media para o remate. Por detrás Jeremy Seewer observaba todos os movementos de Prado e asestou o golpe final para facerse co triunfo parcial.
Gajser e Renaux, os dous primeiros do Mundial, comezaron con problemas. Gajser comezou unha gran remontada e acabou na quinta posición, por diante de Rubén Fernández que foi o sétimo clasificado.
Na segunda carreira volveu a marcar o holeshot, pero non aguantou tantas voltas á fronte. Coldenhoff e Seewer adiantárono mediada a proba e tivo que medirse nun man a man con Gajser nas últimas voltas. Prado conseguiu aguantar ao líder do Mundial e rabuñar algún punto na clasificación.
Rubén Fernández asentouse na quinta posición nesta segunda manga para rematar no quinto posto xeral e demostrar que está só un paso por detrás dos grandes dominadores da especialidade.
