Jorge Prado, un lugués que se converte nun mito do motocrós aos 23 anos
Jorge Prado, un lugués que se converte nun mito do motocrós aos 23 anos
Gañou dous mundiais de MX2 (2018, 2019) e os dous últimos da categoría raíña (2023, 2024)
Deixa o Mundial de motocrós no máis alto para comezar a aventura nos Estados Unidos
Tan precoz como cando toda a súa familia marchou para Bélxica cando Jorge era un cativo. Eles viron o seu potencial e deixárono todo para acompañalo nunha aventura que, con 23 anos, converte a Jorge Prado García (Lugo, 5 de xaneiro de 2001) nun mito do motocrós mundial.
Con só 23 anos Jorge Prado ten no seu palmarés dous títulos de MX2 (2018 e 2019) e dous títulos de MXGP (2023, 2024), a categoría raíña do motocrós mundial. Loitou cóbado con cóbado cos mellores como Jeffrey Herlings ou Tim Gajser e conseguiu impoñerse nunha remonta espectacular.
O seu nome xa está entre os máis grandes da historia, sobre todo pola súa precocidade. Tal e como confirmou o seu pai, Jesús, á Televisión de Galicia Jorge dará outro paso adiante na súa traxectoria. Irase a California a comezar a aventura nos Estados Unidos, alí onde se combinan as especialidades de supercrós e motocrós e onde o deporte de motor acada outro nivel.
