O FBI mostra a arma do agresor de Trump e di que tamén se informara sobre Biden

O FBI publicou este mércores fotografas da arma utilizada no intento de asasinato contra Donald Trump e agregou que nos 30 días anteriores o agresor buscou información tanto sobre o expresidente como sobre o actual mandatario, o demócrata Joe Biden.

O ataque tivo lugar o 13 de xullo durante un mitin en Butler (Pensilvania) e o home, que acabou sendo abatido polas forzas de seguridade, buscou desde primeiros de mes detalles sobre ese acto, desde onde ía estar situado o magnate neoiorquino ata o tempo que ía facer.

Nun comunicado de prensa, o Buró Federal de Investigacións (FBI) explica que durante o mes anterior ao atentado realizou máis de 60 procuras sobre Biden e Trump. Nunha delas, o 5 de xullo, informouse sobre onde ían ter lugar as convencións nacionais demócrata e republicana.

Trump foi ferido na orella, pero unha persoa do público morreu e outras dúas resultaron feridas.

O FBI apuntou que segue traballando para determinar os motivos polos que Thomas Mattew Crooks, de 20 anos, tentou matar ao exmandatario, e tamén para ver se actuou só ou con cómplices. De momento, segundo dixo esa organización, non hai probas de que conspirase con outros nin unha conclusión definitiva sobre as súas razóns.

As súas buscas na rede sobre Trump e Biden remóntanse de feito a finais de setembro de 2023. Ese mes buscou onde ía haber actos de Trump en Pensilvania, mentres que desde abril deste ano e ata o pasado 12 de xullo seguiu informándose sobre actos de campaña tanto del como de Biden. Este último abandonou a súa carreira á reelección o 21 de xullo.

O FBI difundiu a foto do rifle A-15 co que Crooks atacou desde o tellado dun recinto que estaba fóra da zona do mitin e mostrou tamén a mochila recuperada sobre o terreo.

Así mesmo, publicou unha fotografía de dous artefactos explosivos caseiros localizados no maleteiro do seu camión, dos que dixo que había problemas de fabricación.

O agresor efectuara procuras en Internet sobre artefactos explosivos desde setembro de 2019 e continuou solicitando información sobre os mesmos ao longo do verán. Nunha delas buscou sobre como facelos detonar de forma remota.

O FBI detallou que utilizaba contas de correo electrónico encriptadas pero que ese nivel de protección non era máis sofisticado que calquera servizo estándar de mensaxería electrónica.

A autopsia que se lle efectuou despois de que fose abatido polas forzas da orde precisa que morreu como resultado dunha ferida de bala na cabeza e que a análise toxicolóxica deu negativo en abuso de alcol e drogas.

Declarárono morto ás 18:25 da tarde hora local e dúas horas antes hai testemuñas que relataron velo na zona. Estivo no tellado desde o que actuou aproximadamente só seis minutos, entre as 18:05 e as 18:11, hora en que disparou oito veces antes de ser neutralizado.

O FBI aproveitou o comunicado para agradecer a Trump a súa colaboración no interrogatorio que se lle fixo tras o sucedido, unha práctica que é habitual nestes casos. O exmandatario abandonou o escenario puño en alto, deixando para a historia unha imaxe xa icónica.