O Foro Económico calcula que Galicia pode perder ata 634 millóns cun concerto para Cataluña

O Foro Económico de Galicia calcula que a comunidade galega pode perder ata 634 millóns de euros nun escenario de concerto para Cataluña no que esa comunidade non faga ningunha achega solidaria ao sistema.

Así se recolle no estudo 'O impacto económico para Galicia da extensión dos sistemas de concerto', presentando polos economistas Santiago Lago e Xoaquín Fernández Leiceaga este xoves, no que se realizan diferentes simulacións sobre varios escenarios posibles en función do grao de solidariedade que achegaría Cataluña tras o pacto entre PSC e ERC.

De tal forma, a pinza vai dun nivel de solidariedade de Cataluña do 0 % (cun impacto para Galicia de 634,1 millóns) a un nivel de solidariedade do 100 % (con impacto de cero euros ao ser similar ao modelo actual. O estudo tamén recolle niveis de solidariedade catalá nese concerto do: 25 % (impacto de 475,6 millóns para Galicia), do 50 % (317 millóns) e do 75 % (158,5 millóns). Estas cifras calcúlanse con datos de 2022, sen ter en conta a posterior inflación.

Ademais, o estudo realiza un exercicio teórico de simulación sobre que pasaría se o modelo de concerto se trasladase a todas as comunidades. Neste suposto no que as autonomías recadasen todos os impostos e fixesen unha achega en función do PIB, o prexuízo para Galicia chegaría a supoñer unha perda de 2.128 millóns sobre o actual modelo.

Precisamente, a pasada semana, o conselleiro de Facenda, Miguel Corgos, advertiu de que a saída de Cataluña do réxime común supoñería unha perda de 628 millóns de euros para Galicia, cifra similar á presentada polo Foro Económico este xoves.

"O que menos prexudica é o modelo común"

O director do Foro Económico, Santiago Lago, define este documento como "moi necesario" e aclara que esta entidade "non entra na dimensión política, entra nos números".

De tal forma, Lago avisa de que "calquera modelo que corte a redistribución" e solidariedade do actual sistema "non vén ben" a Galicia en termos financeiros. Apunta que "é normal" porque "a capacidade fiscal de Galicia "está por baixo do 90 % da media" e os servizos custan máis que a media, "ao redor do 110 %".

En resumo, tanto Santiago Lago como Xaquín Fernández Leiceaga coinciden en que "o que menos prexudica a Galicia é que siga o modelo común".

Leiceaga, crítico co concerto para Cataluña

Pola súa banda, Fernández Leiceaga, quen tamén é membro da actual executiva do PSdeG e foi candidato á Xunta polos socialistas galegos, mostrouse crítico cun concerto para Cataluña. Asegura que lle parece "moi ben" que Salvador Illa fose investido presidente na Generalitat, pero "non o acordo", aínda que "forma parte das opcións políticas".

Dado que o texto do acordo entre PSC e ERC "se presta a interpretacións" e non se pode saber "o que vai ser", o Foro elixiu realizar diferentes simulacións en función de como se aplicaría.

Sobre unha extensión xeneralizada do modelo de concerto, Leiceaga avisa de que "non é do noso interese chegar a un modelo deste tipo" ao perder ata 2.128 millóns Galicia, polo que di que "os que o defenden terán que explicar por que o fan". Avoga por afastarse de modelos "extremos" e mellorar "a equidade que xa hai hoxe" no actual modelo común.

A preguntas da prensa sobre a defensa do BNG dun concerto económico para Galicia, Lago indica que ao Foro non lle sae "por ningún sitio" a conta de que Galicia "gaña" cunha redución da solidariedade. Agrega que "non hai ningunha estimación feita fóra de Galicia" na que a balanza fiscal sexa negativa para a comunidade galega. "Non me encaixa moito", sostén.

Leiceaga, que dixo descoñecer de onde saen as contas do BNG, lembra que no seu día cando Cataluña falaba das balanzas fiscais só computaba os gastos na comunidade catalá, pero non os gastos do Estado nesa autonomía.

Quitacións

Cuestionados sobre se unha quita beneficiaría a Galicia, Santiago Lago opinou que pode haber dous posibles niveis. Nun primeiro nivel, a Xunta pode estar en contra dunha quita por considerala inxusta, pero esa mesma Xunta chegado un momento no que se lle vai facer unha quita a outra comunidade diga: "Se lla fas a el, a min tamén".

Nese segundo escenario, aposta por que se fagan quitas similares en termos per cápita para que non haxa discriminacións entre comunidades.