O G7 e a UE restrinxen as vendas de ouro das reservas do Banco de Rusia

Os países do G7 e da Unión Europea acordaron este xoves restrinxir as transacións de ouro do Banco Central de Rusia para evitar que Moscova utilice as súas reservas neste metal sorteando as sancións adoptadas pola comunidade internacional por mor da guerra en Ucraína.

Cortar a capacidade do Kremlin para aliviar o impacto das represalias é un dos principais obxectivos que as principais potencias mundiais adoptaron desde o inicio da guerra cos primeiros paquetes sancionadores.

Lograron devaluar a divisa rusa ata os 130 rublos por dólar, desde os 80 rublos por dólar, a cifra de antes da invasión.

"Os líderes do G7 e da Unión Europea seguirán traballando xuntos para reducir a capacidade de Rusia de despregar as súas reservas internacionais para apuntalar a economía de Rusia e financiar a guerra de Putin", anunciou a Casa Branca no seu comunicado. 

España fará un novo envío de armas a Ucraína

España ratifica o seu compromiso con Ucraína cun novo envío de armas. O presidente do Goberno español, Pedro Sánchez, falou da unidade da OTAN e a UE como a mellor resposta ao presidente ruso, Vladimir Putin, pola invasión Ucraína, país co que ratificou o compromiso de España anunciando un novo envío directo de armamento.

Sánchez participou en Bruxelas no cumio extraordinario da Alianza Atlántica e na xuntanza posterior do Consello Europeo que estivo precedida dun encontro dos xefes de Estado e de Goberno da UE co presidente dos Estados Unidos.