O Gatañal festexa a primeira vitoria da temporada do Cangas

O Cangas Frigoríficos do Morrazo festexou a primeira vitoria da temporada na súa pista do Gatañal. Impúxose ao Villa de Aranda, un rival directo pola permanencia, ao que lle gañou por 27-24. Tivo un bo inicio o equipo do Cangas (4-1) pero o Villa de Aranda reaccionou e colleu a primeira vantaxe pasado o minuto vinte (9-10). Aínda así foi o conxunto galego o que marchou por diante aos vestiarios cun 14-12. 

Na segunda metade o Frigoríficos volveu a marcar unha boa vantaxe de catro tantos (20-16). O conxunto visitante nunca deu o seu brazo a torcer e conseguiu poñerse a un só gol (22-21) pero o desenlace acabou sendo favorable ao Cangas. O acerto de Mads Thymann Hansen -7 goles en total- resultou fundamental para acadar o triunfo.