O Goberno admite conversacións con ERC para crear un consorcio fiscal con Cataluña

O Goberno de Pedro Sánchez admite que nas súas conversacións con Esquerra Republicana de Cataluña (ERC) está sobre a mesa a posibilidade de crear un consorcio tributario entre o Estado e a Generalitat ao que se encargaría a tarefa de recadar o 100 % dos impostos nesta comunidade autónoma.

Así o indican fontes do Goberno, que remarcan que esa potestade, a de recadar a totalidade dos impostos de Cataluña, vén recollida no Estatut. Nese sentido, na Moncloa e tamén en Ferraz insisten en que a proposta que os socialistas farán a ERC para que apoien a investidura do líder do PSC Salvador Illa pasa por desenvolver o xa recollido no Estatuto de Autonomía. As negociacións están en marcha e están a ser pilotadas polo PSC, que ata o momento non comunicou "nin avances nin retrocesos" respecto a un acordo cos republicanos que poida abrir as portas do Govern a Illa.

Con todo, recoñecen que sobre a mesa está a negociación deste consorcio tributario e que esta medida pode supoñer a recadación do 100 % dos tributos, aínda que non se concretaron os detalles nin a porcentaxe de tributos que asumiría.

Así, o artigo 204 do Estatut, dedicado á Axencia Tributaria de Cataluña, sinala que a xestión, recadación, liquidación e inspección dos tributos do Estado en Cataluña corresponderá á Administración Tributaria do Estado, sen prexuízo da delegación que a Generalitat poida recibir deste e da colaboración que poida establecerse especialmente cando así o esixa a natureza do tributo. 

Actualmente xa existe a Axencia Tributaria de Cataluña e, de feito, o presidente do Goberno Pedro Sánchez mostrouse disposto a desenvolvela, segundo indicou a finais de 2023 en Barcelona, a onde acudiu para reunirse co daquela presidente da Generalitat Pere Aragonès (ERC).

Despois daquela reunión, ao ser interrogado sobre se estaría disposto a desenvolver a Axencia Tributaria catalá, o xefe do Executivo non pechou a porta e dixo que é algo que está no Estatuto de Autonomía e está "por desenvolver". "Cuestión distinta é como se materializa", apuntou a continuación.

Ata o momento, o Goberno veu sostendo que busca unha "fórmula imaxinativa" sobre o financiamento para Cataluña que poida cumprir as expectativas de ERC, que permanece nunha posición de máximos e segue reclamando soberanía fiscal e recadar e xestionar o 100 % dos tributos.

Isto supoñería saír do réxime común das comunidades autónomas e transitar cara a un sistema de concerto e cota, como o que teñen País Vasco e Navarra, que recadan todos os impostos e despois pagan unha parte ao Estado; unha opción inaceptable para o Executivo de Sánchez, que considera que se trata dunha liña vermella, segundo defendeu nas últimas semanas.