O Goberno asegura que a A-54 estará completada a finais de 2025: "A obra alongouse durante demasiado tempo"

O secretario de Estado de Transportes e Mobilidad Sostible, José Antonio Santano, dixo este xoves que as obras da autovía entre Lugo e Santiago de Compostela, a A-54, entran xa en “a súa recta final”, de modo que o tramo entre Palas de Rei e Melide estará “operativo a final de ano” e o trazado quedará completado antes de que termine 2025.

Santano fixo estas declaracións durante a visita que realizou ás obras do viaduto sobre o río Pambre en Palas de Rei, pertencente ao tramo Palas de Rei-Melide da autovía Lugo-Santiago.

“Cal é a boa noticia, que estamos na recta final. Isto acábase xa. Este tramo de Palas de Rei-Melide a final de ano estará operativo. O que queda pendente, o de Melide-Arzúa, vai estar final do ano que vén”, asegurou o secretario de Estado.

Finalizados eses dous tramos, “teremos completa unha obra que, para que todo o mundo faga unha idea da envergadura que ten, vai supoñer o investimento de máis de 700 millóns de euros”, precisou Santano en declaracións aos medios de comunicación. Desde o seu punto de vista, “hai un compromiso do Goberno de España con Galicia e coas súas infraestruturas”.

“Hai que agradecer a paciencia dos veciños e veciñas da contorna. É unha obra que se alongou durante demasiado tempo. É unha realidade. Evidentemente, non é responsabilidade nin miña nin do ministro actual, pero debemos pedir desculpas”, engadiu. Recoñeceu, nese sentido, que “as grandes obras tardan demasiado tempo”, pero tamén incidiu en que “o importante é que haxa unha vontade de permanecer no investimento”.

“Polo que puiden ver, desde o ano 2018, con este Goberno, isto non parou. Os feitos son os que demostran que estes discursos son reais”.

En canto ao trazado da autovía, precisou que os usuarios poderán desprazarse entre Lugo e Santiago nun tempo “moi diferente” ao que empregan agora mesmo, en torno “a 50 minutos”. Dixo, nese sentido, que destaca pola “seguridade e a sustentabilidade”.

“Procede agradecer o traballo que fixeron os técnicos, porque creo que xa se ve cal é a envergadura do proxecto e do traballo. Ademais de agradecer ese traballo técnico, tamén hai que agradecer a sensibilidade ambiental, porque é un valor que non podemos perder de vista, sobre todo nun Lugar de Interese Comunitario (LIC), que require dunha serie de medidas que hai que incorporar á Declaración de Impacto Ambiental”, engadiu.

Abre o orbital de Santiago

O secretario de Estado de Transportes e Mobilidade Sostible, José Antonio Santano, e a alcaldesa de Santiago, Goretti Sanmartín, presidiron este xoves a posta en servizo do novo enlace orbital situado sobre a autoestrada AP-9 que permite conectar a AP-9 coa A-54, a través dunha vía existente (SC-30) e mellorar a conectividade co aeroporto Santiago-Rosalía de Castro.

O secretario de Estado de Transporte, José Antonio Santano, xunto co delegado en Galicia, Pedro Blanco; a alcaldesa de Santiago, Goretti Sanmartin e a subdelegada do Goberno na Coruña, Maria Rivas (EFE/ Xurxo Martinez)

Santano indicou durante a posta en servizo que se trata ademais dun importante nó de conexión entre a autoestrada AP-9, a autovía A-54 e os polígonos da Sionlla e Costa Vella.

De feito, a posta en servizo do orbital desconxestionará o acceso e saída destes polígonos, permitindo que os vehículos pesados dispoñan dun acceso directo ás vías de alta capacidade mencionadas. Ademais, a conexión directa coa A-54 facilitará o acceso ao aeroporto de Santiago-Rosalía de Castro.

A actuación contou cun investimento superior a 28 millóns de euros e consistiu na construción dun novo enlace situado sobre a autoestrada AP-9 á altura do punto quilométrico 64+500 e unha vía de 967 m (SC-30) que conecta directamente a AP-9 (adxacente ao polígono da Sionlla) coa A-54 á altura do núcleo poboacional de San Marcos.