O Goberno crea un comisionado especial para reconstruír e reparar os danos da DINA

O Consello de Ministros aprobou este martes a creación dun comisionado especial para a reconstrución e reparación dos danos provocados pola DINA entre os pasados 28 de outubro e 4 de novembro en diferente zonas da península e Baleares.

Este dependerá do Ministerio de Política Territorial con rango de subsecretaría e con vixencia temporal e encargarase do impulso, coordinación e seguimento da execución das medidas adoptadas pola administración xeral do Estado para paliar os danos, ademais da coordinación coas administracións territoriais afectadas, segundo informou o Goberno nun comunicado.

En opinión do Goberno, a magnitude dos danos ocasionados e as medidas que son necesarias para a recuperación da normalidade nas zonas afectadas xustifican a actuación da administración xeral do Estado e a declaración de zona afectada gravemente por unha emerxencia de protección civil.

De acordo co real decreto que regula a creación, adscrición e funcións do comisionado especial, este centrará boa parte das súas funcións en facer un seguimento das axudas e anticipos concedidos e en propoñer novas medidas á Comisión Interministerial para o desenvolvemento de accións urxentes.

Contará tamén coa colaboración dos órganos competentes do Estado por razón da materia, así como dos órganos das administracións territoriais afectadas, en virtude dos principios de cooperación e coordinación entre administracións públicas.

O Goberno asegurou que o decreto ditouse en exercicio da potestade de autoorganización da administración xeral do Estado e non afecta as competencias das comunidades autónomas. Ademais está convencido de que terá un impacto positivo sobre a economía, en tanto que "coadxuvará a retomar as actividades empresariais que se viron afectadas pola DINA".