O Goberno denuncia "persecución" contra o irmán de Pedro Sánchez
David Sánchez decide renunciar ao seu posto na Deputación de Badaxoz en plena investigación xudicial para determinar como accedeu a ese contrato
O Partido Popular pídelle a Pedro Sánchez que tome o mesmo camiño
A xuiza que investiga o irmán de Pedro Sánchez pon en dúbida os informes que lle remitiu
David Sánchez dá un paso ao lado e renuncia ao posto de alta dirección que tiña na Deputación de Badaxoz desde xullo de 2017.
O irmán do presidente do Goberno abandona o seu posto de xefe da Oficina de Artes Escénica, en plena investigación xudicial sobre como conseguiu ese contrato.
A xuíza que leva o caso sostén que todo fai indicar que ese posto de traballo se creou especificamente para el. A renuncia prodúcese despois de que o concurso para o seu programa estrela quedase deserto. Non houbo ningunha empresa interesada.
Na deputación agradécenlle o traballo e entenden a marcha. Desde o Goberno saíron en tromba a defendelo. Denuncian unha cacería, defenden os seus méritos e din estar tranquilos porque o tempo "determinará que aquí non hai nada", sostén a voceira do executivo, Pilar Alegría.
O Partido Popular tira de sarcasmo. Di Feijóo que "por algo se comeza", e apunta ao presidente do Goberno. O líder popular convida o presidente Sánchez a tomar o mesmo camiño porque, "España necesita de políticos limpos e un presidente libre de sospeita".
O músico declarou como investigado hai case un mes. Negou as acusacións de absentismo laboral e defendeu a legalidade no seu acceso á praza. A investigación segue viva. O presidente do organismo provincial tamén está a ser investigado neste caso. A Deputación volverá sacar a concurso este contrato.
