O Goberno nomea por sorpresa un comisionado para o Corredor Atlántico
O Goberno nomea por sorpresa un comisionado para o Corredor Atlántico
A creación deste cargo era unha das peticións dos presidentes autonómicos que este venres se reúnen en Santiago
A decisión coñeceuse unha hora antes de iniciarse o cumio entre Rueda, Barbón e Mañueco
O cumio autonómico organizado polos presidentes de Galicia, Asturias e Castela e León deu un xiro a menos dunha hora do seu inicio debido a que o Goberno deu cumprimento, por sorpresa, a unha das súas peticións.
Mediante un comunicado, o Ministerio de Transportes, Mobilidade e Axenda Urbana (MITMA) nomeou a José Antonio Sebastián Ruiz, ata o de agora xerente de Material de Renfe Mercadorías, como comisionado do desenvolvemento do Corredor Atlántico.
Precisamente esta era unha das peticións que tiña previsto recoller a declaración institucional que os xefes dos Executivos autonómicos lerán ao final do acto.
No momento do anuncio, varios dos relatores estaban a reclamar a creación deste comisionado para o seguimento e actualización do plan director do Corredor Atlántico para así axilizar o desenvolvemento da infraestrutura e os seus servizos xa que o Corredor Mediterráneo xa contaba con este órgano en funcionamento.
Con este nomeamento, di Transportes nunha nota, preténdese axilizar o desenvolvemento da infraestrutura para potenciar o transporte de mercadorías por tren en España e a conectividade con Europa, especialmente con Portugal e Francia, nun proxecto dotado con 2.477 millóns de euros con cargo ao Plan de Recuperación, Transformación e Resiliencia, financiado con fondos da UE.
Desa cantidade, os Orzamentos Xerais do Estado de 2023 recollen unha partida de 1.648 millóns de euros en investimentos para avanzar en completar e ampliar o Corredor Atlántico, unha cifra moi similar á reservada para o Corredor Mediterráneo.
O comisionado prevé convocar unha primeira reunión de alto nivel en Asturias cos principais actores do Corredor Atlántico para poñer en común as necesidades e prioridades da infraestrutura ferroviaria.
José Antonio Sebastián Ruiz era ata o de agora xerente de Material de Renfe Mercadorías e coñece de primeira man, segundo o Ministerio, un sector que pretende duplicar a cota modal do tren no transporte terrestre de mercadorías, ata chegar ao 10 %.
Licenciado en Xeografía e máster en Dereito e Xestión do Transporte, Sebastián dedicou os últimos 15 anos da súa vida ao transporte de mercadorías por ferrocarril tanto no ámbito público como no privado e conta tamén con experiencia docente.
Antes de Renfe traballara na extinta Ferrocarrís de Vía Estreita (FEVE) no norte de España entre 2008 e 2012, en Fenit Trail, dedicada á fabricación e transformación de material rodante ferroviario, e en Tramrail, dedicada ao mercado internacional.
No sector privado dirixiu diversas empresas ferroviarias, como Transitia Rail entre os anos 2012 e 2018 ou GO Transport entre 2018 e 2021.
