O Goberno poñerá en marcha en novembro unha "pasarela" para pasar ao IMV ao esgotar o subsidio por desemprego

O Ministerio de Inclusión, Seguridade Social e Migracións poñerá en marcha en novembro unha "pasarela" para pasar a cobrar o ingreso mínimo vital (IMV) despois de esgotar o subsidio por desemprego.

Así o anunciou este xoves a secretaria Xeral de Inclusión, Elena Rodríguez, quen apuntou que se trata dunha "pasarela" para axilizar o paso do IMV ao subsidio por desemprego, para o que estarán en contacto entre o SEPE e o INSS.

Esta ferramenta, que estará dispoñible o 22 de novembro, busca evitar que as persoas queden meses sen cobrar esta axuda. En todo caso, dixo que as persoas non pasarán a cobrar a prestación automaticamente, senón que terán que cumprir unha serie de requisitos.

Así mesmo, Rodríguez expuxo que o 40 % das persoas que potencialmente quererían chegar ao IMV e que aínda non o fixeron "están a perder ingresos". Ademais, sobre esta cuestión engadiu que a maioría deles son procedentes do subsidio de desemprego.

Na mesma liña, a ministra de Inclusión Seguridade Social e Migracións, Elma Saiz, avanzou este xoves que o teléfono 020, que servirá para reforzar información sobre a prestación e resolver dúbidas da mesma, estará dispoñible en novembro.