Carlos Alcaraz está xa en semifinais do Conde de Godó

Carlos Alcaraz segue avanzando no Conde de Godó. O tenista murciano está en semifinais do torneo barcelonés logo de derrotar a Álex de Miñaur en dous sets por 7-5 e 6-3. 

Alcaraz tivo que sufrir para superar ao australiano, especialmente no primeiro parcial. Non foi quen de desenvolver o seu mellor tenis o número 2 do mundo, que sufriu a rotura do saque no terceiro xogo e que non era quen de afinar coas súas deixadas. Malia os problemas, Alcaraz foi quen de se aferrar á pista e tirar proveito dos problemas de De Miñaur co seu saque.

No segundo set Alcaraz amosou un xogo máis fluído e non tivo problemas para se facer co partido e prolongar a súa serie vitoriosa en Barcelona. Nas pistas do Godó leva 13 triunfos e ningunha derrota.