O Goberno traspasa a Euskadi as competencias de meteoroloxía que reclama Galicia

O Executivo central e o Goberno vasco ratificaron este xoves na Comisión Bilateral o traspaso a Euskadi das competencias sobre permisos de traballo a persoas estranxeiras e sobre meteoroloxía, así como a cesión gratuíta da antiga sede da AEMET en San Sebastián.

Explicouno a portavoz do Executivo vasco e conselleira de Gobernanza, María Ubarretxena, nunha comparecencia de prensa tras a reunión da Comisión Bilateral que mantivo este xoves co ministro de Política Territorial, Ángel Víctor Torres.

Segundo dixo a conselleira, a competencia sobre permisos de traballos para persoas estranxeiras "servirá para poder completar os criterios de acollida" das persoas migrantes e "facilitar a súa integración".

En concreto, a Administración vasca cualificará as autorizacións de traballo por diferentes motivos, como a cura da enfermidade, por motivos de estudo ou servizos de voluntariado ou actividades formativas, mentres que o Estado poderá participar nas contratacións en orixe e o Goberno vasco encargarase de verificar algúns asuntos para logo facilitar a obtención do permiso de residencia que emite o Goberno central.

Esta transferencia será xestionada polo departamento que lidera o vicelehendakari segundo e conselleiro de Emprego, Miquel Torres.

Euskadi emitirá avisos meteorolóxicos

Coa competencia de meteoroloxía, Euskadi poderá emitir avisos e alertas de impacto meteorolóxico. "O traspaso ten unha vinculación directa coas políticas de prevención de catástrofes naturais e tamén coa loita contra o cambio climático", sostivo a conselleira vasca.

Así mesmo, o Goberno vasco participará en organismos internacionais como a Organización Meteorolóxica Mundial, o Foro de Usuarios Copernicus, o Centro Europeo de Predición a medio prazo ou o Grupo de Observacións da Terra.

"Euskadi terá voz propia e unha presenza maior nas institucións europeas e nas institucións internacionais", proclamou Ubarretxena, que explicou que nesta Comisión Bilateral tamén se acordou a cesión gratuíta da antiga sede da AEMET en San Sebastián.

Galicia prepara unha lei do clima no caso de que o Goberno non lle traspase as competencias

Os gobernos central e vasco materializaron este xoves o traspaso dunha competencia, a de meteoroloxía, que leva tempo reclamando Galicia. De feito, o Goberno galego está a preparar xa unha lei do clima para poder asumilas no caso de que o Estado rexeite a súa solicitude.

O obxectivo é que o servizo galego de meteoroloxía, MeteoGalicia, poida emitir as súas propias alertas, sen ter que depender da Axencia Estatal de Meteoroloxía (Aemet).

En canto á outra competencia, o presidente da Xunta, Alfonso Rueda, xa avanzou en febreiro que o Goberno galego quere igualmente avanzar neste ámbito e reclamará "poder tramitar todo o que ten que ver cos permisos laborais" de migrantes, empezando pola homologación de títulos de sistemas de educación superior estranxeiros.