O Liceo abre a OK Liga diante do Igualada

E esta tarde ás seis veremos en directo na G2 a estrea do Deportivo Liceo na OK Liga. O Igualada será o primeiro rival do conxunto liceísta, que chega a este encontro logo de facer unha boa pretemporada e de dar unha excelente imaxe na Supercopa a fin de semana pasada. Malia a derrota ante o Barça por un axustado tres a dous, as sensacións do equipo de Juan Copa foron moi boas, con actuacións destacadas das novas incorporacións.

A continuidade de xogadores como Dava Torres ou César Carballeira tamén axuda á consistencia dun grupo moi cambiado respecto da temporada anterior. Juan Copa valoraba na previa o traballo feito durante o verán: "Fomos ao mercado, e fixemos un equipo con moito sentido. Galego, con xente nova e de futuro. Imos ser un equipo rápido, que poida transicionar mellor ca o ano pasado. Estou contento co equipo".