O Liceo golea 1-5 ante un frouxo Alpicat
O Liceo golea 1-5 ante un frouxo Alpicat
Segundo triunfo consecutivo, que coloca os coruñeses con 12 puntos na táboa
A boa serie continúa. O Deportivo Liceo de Juan Copa viaxou a Alpicat e gañou contra o recentemente ascendido á OK Liga, un segundo triunfo consecutivo que coloca os coruñeses con 12 puntos na táboa e os instala na parte alta desta Fase Regular.
O conxunto local saíu ben á pista, motivado e seguro de sacar un resultado positivo da visita dos verdes e brancos. O aviso serio non tardou en chegar. Corría o sétimo minuto de xogo cando Iago Vázquez, atento tras unha loita dentro da área, conseguiu superar a un Martín que repetía titularidade. As consecuencias duraron segundos. César, cun bo disparo, empatou na xogada posterior ao saque de centro.
Un golpe que non intimidou os homes de Sito Expósito, recentemente ascendidos pero desexosos de dar un golpe na mesa. Intentaron inquietar de novo a Martín en varias ocasións, pero foi a pegada do Liceo a que se acabou impoñendo. Nil Cervera estreou o seu rexistro goleador no minuto 20 cun disparo espectacular desde o costado esquerdo (1-2). Nada puido facer o meta Bosch, que viu como a bóla entraba pola escuadra.
Antes do descanso, outra boa acción de Fabri ampliou a vantaxe dos de Juan Copa. Tal e como fixera Vázquez no gol local, o número 9 visitante aproveitou unha bóla morta na área para anotar o 1-3 que chegou ó descanso.
O atacante arxentino asestou outro duro golpe ao Alpicat nada máis regresar. Un desaxuste defensivo derivou nun claro man a man de Fabri, que non perdoou e sumou o seu segundo tanto no partido (o terceiro no curso).
Entón comezou o correcamiños. Os de Sito Expósito tomaron riscos e atoparon en varias ocasións ó porteiro liceísta, aínda que o Liceo aproveitou os espazos para xerar numerosos achegamentos claros. O guión favorecíalles. Quen atopou o premio foi Nil Cervera, que ao igual que Fabri anotou a súa segunda diana particular. Ese 1-5 foi o que mostrou o marcador ao soar a bucina.
Sen moito tempo agora para descansar, o Liceo regresa a Galicia para comezar a preparar a visita do Calafell a Riazor. Esta oitava xornada disputarase o domingo 17 ás 12:00 h.
