O Lugo destitúe a Paulo Alves e dálle o temón a Roberto Trashorras
O Lugo destitúe a Paulo Alves e dálle o temón a Roberto Trashorras
Despois dun comezo dubitativo con tres derrotas consecutivas, o equipo conseguira encadear unha serie de catro xornadas sen perder co portugués
Trashorras estaba a dirixir o Polvorín, ao que volvera no mes de novembro
O Lugo comunicou o despedimento do adestrador portugués Paulo Alves. E fíxoo despois de gañar en Teruel e de que o equipo sumara dúas vitorias e dous empates nos últimos catro partidos en que comezaba a remontar o voo.
O seu substituto será Roberto Trashorras. O de Rábade, cunha ampla experiencia no fútbol profesional e máis de 170 partidos en Primeira División, estaba a dirixir o Polvorín ao que regresara no mes de novembro despois do descenso que sufrira a temporada pasada desde a 2ª RFEF. Trashorras é un adestrador da confianza de Tino Saqués. Deulle a alternativa no equipo xuvenil e logo pasouno ao Polvorín cando o equipo subiu de categoría.
![](https://img-g24-crtvg.flumotion.com/prog24/2024/20240219/alves.png)
Despois dun inicio dubitativo con tres derrotas ligueiras consecutivas (Celta Fortuna, Tarazona e Nàstic) Paulo Alves empezara a facerse do equipo a partir dese intre. A chegada de reforzos invernais como Fran Mérida ou Mario da Costa axudaron a consolidar un equipo que empezaba a apuntar cara arriba, pero aínda estaba lonxe dos obxectivos marcados ao comezo da temporada. O Lugo é noveno e está a sete puntos da fase de ascenso. Cando Alves substituiu a Munitis o equipo atopábase a só tres puntos desa fase de ascenso.