O Luton Town porá a proba o momento de forma do Celta

O Celta fai parada en terras inglesas para medir o seu momento de forma diante do Luton Town, un equipo que a temporada pasada estaba na Premier League e que este ano parte como un dos favoritos para recuperar a categoría perdida na Championship (Segunda División de Inglaterra).

O equipo de Giráldez vén de perder diante do Lille con claridade (3-1) e sairá coa máxima motivación para darlle a volta á imaxe que deu en Francia. O adestrador segue sen poder contar con Vicente Guaita co que probará as opcións que ten para ocupar a portería de cara ao primeiro partido de Liga en apenas quince días. 

Serán dous os partidos que xogue o Celta en Inglaterra. O deste sábado diante do Luton (en diferido o domingo na G2) e o vindeiro sábado no campo do West Ham United, un equipo xa de Premier League e que vén realizando boas temporadas clasificándose para as competicións europeas.