O ministro de Transportes francés, investigado por malversación de fondos públicos

A Xustiza francesa investiga o ministro de Transportes, Philippe Tabarot, por malversación de fondos públicos relacionados con ingresos obtidos en empregos asignados polo Concello da cidade de Cannet, que controla a súa irmá.

A Fiscalía Nacional Financeira lanzou esa investigación preliminar tamén por apropiación indebida e por receptación, é dicir por beneficiarse do diñeiro obtido con eses dous supostos delitos, tras a advertencia recibida da Alta Autoridade para a Transparencia da Política, un organismo encargado de verificar e controlar as declaracións de intereses de determinados cargos públicos.

No marco desta investigación, o 30 de novembro de 2022 levouse a cabo un rexistro no domicilio de Tabarot, no Concello de Cannet e no Grupo de Interese Público municipal desta cidade situada xunto a Cannes (sueste de Francia) para o que traballou como senador do partido conservador Os Republicanos ata o seu nomeamento como ministro o pasado 23 de decembro

A súa irmá, a actual deputada do partido, Michèle Tabarot, foi alcaldesa alí entre 1995 e 2017, e aínda que tivo que deixar o cargo para poder acceder ao Parlamento, segue sendo na práctica a xefa da maioría que dirixe o Concello.

De feito, segundo Le Monde, diario que revelou a información, a Fiscalía Nacional Financeira pretende determinar se Philippe Tabarot cometeu unha ilegalidade ao acumular retribucións de dous empregos atribuídos polo Concello e polo GIP municipal e se se aproveitou da situación en Cannet para obter vantaxes indebidas.