Cidades e vilas galegas claman contra a desigualdade

O tempo desapracible non botou para atrás as galegas, e cada vez máis galegos, empeñadas en lembrar, como cada 8M, todo o que queda por facer en materia de igualdade.

"Temos que empezar por educar. Non excluír, creo que tanto o movemento trans como os homes teñen que participar, isto non é unha loita só nosa", di unha manifestante.

A axenda feminista segue aberta. Mantense a fenda salarial e a desigualdade no acceso a determinados postos de traballo. E moitas mulleres que ven limitado o seu desenvolvemento profesional e persoal por asumir en solitario os coidados de nenos e maiores.

"Temos dereito a vivir libres, sen culpas para facer a nosa vida como queiramos, polo día ou pola noite, nas nosas casas, nos nosos postos de traballo", explica unha integrante da Plataforma Feminista de Galicia.

Sempre presente tamén a loita contra os feminicidios, e a violencia de xénero en todas as súas vertentes.

"Aínda existe moita violencia cara á muller,  micromachismo, moito acoso nas rúas", relata unha moza moi nova participante nas marchas.

En Compostela a Plataforma Feminista e a Marcha Mundial das Mulleres ían manifestarse por separado, pero saíron practicamente xuntas.

"Temos máis en común que o que nos separa, somos mulleres, somos as protagonistas e é o noso día",  incidían na Plataforma Feminista.

Nas outras cidades, aínda que non houbo convocatoria unitaria, as diferentes plataformas tamén marcharon ao mesmo tempo e co mesmo percorrido.