O Obradoiro cae nun final apertado diante de Bilbao Básket

O Monbús Obradoiro perdeu en Bilbao nun duelo moi igualado que se decidiu no treito final (80-76). 

O equipo galego comezou moi ben o partido cun parcial de inicio de 2-11 pero Bilbao reaccionou e ao final do primeiro cuarto situouse a só catro puntos (12-16). No segundo parcial Obradoiro volveu dar un chimpo marchando por riba dos dez puntos cun 12-23. Bilbao volveu reaccionar e, cun parcial de 14-3 colleitaba a primeira vantaxe do partido (32-31). Ao descanso o resultado era de máxima igualdade (40-40).

No terceiro cuarto o partido mantivo a igualdade con constantes empates e ningún dos dous equipos logrou vantaxes de máis de catro puntos. Todo quedou pendente do último cuarto no que Bilbao estivo máis atinado. Unha tripla de Hakanson a 4 minutos do final poñía un +6 (71-65) que xestionaron os locais ata conseguir o triunfo. 

Bilbao e Obradoiro quedan empatados con 3 triunfos na zona baixa da clasificación.