O papa Francisco aparece na praza de San Pedro o Domingo de Ramos

O papa Francisco, que segue convalecente polos seus problemas de saúde, apareceu sen que estivese previsto ante os fieis na praza de San Pedro do Vaticano, ao termo da misa do Domingo de Ramos.

O pontífice, de 88 anos, apareceu na cadeira de rodas e sen as cánulas nasais para o osíxeno e quixo saudar os fieis tras a celebración que marca o inicio da Semana Santa.

"Bo Domingo de Ramos, boa Semana Santa", dixo brevemente no altar central da praza, onde saudou o cardeal arxentino Leonardo Sandri, no que o papa delegou para que presidise a misa do Domingo de Ramos.

Francisco paseou entre os fieis e detívose a intercambiar algunhas palabras cun grupo de monxas que lle deron mensaxes de ánimo. Tamén saudou varios nenos, cos que mostrou xestos de complicidade, mentres se oían berros de "Viva o papa!".

Trátase da última aparición por sorpresa do pontífice durante a súa convalecencia na súa residencia da Casa Santa Marta, desde que o 23 de marzo saíu do hospital Gemelli de Roma despois de 38 días ingresado por unha pneumonía bilateral e outros problemas respiratorios.

Tras a súa reaparición do domingo pasado na praza vaticana durante o Xubileu dos enfermos Francisco saíu noutras dúas ocasións da residencia e recibiu por sorpresa os reis Carlos e Camila, a pesar de que os médicos estimaron que debía permanecer polo menos dous meses de repouso.