O papa Francisco precisa "repouso absoluto" e non pronuncia o Angelus este domingo

O papa Francisco pasou a súa segunda noite no hospital Gemelli de Roma, onde se atopa ingresado por unha infección nas vías respiratorias, e, para facilitar a súa recuperación, este domingo non pronunciou a oración do Ángelus.

O pontífice, de 88 anos, volveu pasar unha noite tranquila, segundo a televisión pública RAI e a axencia Ansa, como xa sucedeu na véspera, cando "descansou toda a noite" e "non presentou ningún episodio febril", segundo informou o Vaticano.

O papa Francisco necesita repouso absoluto para facilitar a súa recuperación. No comunicado da Santa Sé tamén se explica que o santo padre decidiu enviar o texto da oración do Angelus para a súa publicación.

O pontífice ingresou este venres no hospital Gemelli de Roma por mor dunha bronquite, segundo informou o Vaticano, para recibir tratamento por unha infección nas vías respiratorias.

Segundo as mesmas fontes, que se mostran tranquilizadoras, a terapia á que está a ser sometido está a mellorar a súa situación.

Francisco, de 88 anos, sofre unha bronquite que nos últimos días lle imposibilitara ler algúns discursos e que finalmente obrigou a hospitalizalo para sometelo a exames diagnósticos e seguir un tratamento.

"O Santo Padre, tras a persistencia da bronquite destes días, someteuse a unhas análises especializadas e comezou a terapia farmacolóxica hospitalaria", indicou onte á noite o Vaticano.

As análises demostran unha infección nas vías respiratorias, explicaba un comunicado, no que engadía que as súas condicións clínicas eran discretas (moderadas) e que presentaba unha alteración febril leve.

Tras a publicación dese primeiro parte, o portavoz vaticano, Matteo Bruni, afirmou que o Papa está sereno, de bo humor e leu algún xornal.

Dada a situación, Francisco anulou a súa participación en audiencias ata o vindeiro luns, como a súa presenza no xubileu dos artistas ou a súa visita aos estudios cinematográficos romanos de Cinecittà, polo que se espera que continúe hospitalizado como mínimo ata ese día.

Desde principios de febreiro o Papa explicou que sufría un "forte arrefriado", como el mesmo dixo na audiencia xeral do mércores 5 de febreiro e nos días sucesivos mantivo as súas audiencias, pero na súa residencia, a Casa Santa Marta, para non trasladarse ao palacio pontificio "debido a unha bronquite", informou a Santa Sé.

Esta é a cuarta vez que o pontífice ten que ser hospitalizado no Gemelli.

Anteriormente, o pontífice arxentino xa sufrira gripe e problemas respiratorios que mesmo o obrigaran a estar ingresado tres días en marzo de 2023 e en novembro de 2023. Agora estes problemas respiratorios obrigárono a cancelar a súa viaxe a Dubai pola COP28.