O papa Francisco reaparece en público na praza de San Pedro: "Bo domingo a todos e grazas"

O papa Francisco volveu este domingo para presentarse en persoa ante os fieis na praza de San Pedro, tras dúas semanas de convalecencia illada na súa residencia vaticana e 38 días de hospital polos seus problemas respiratorios.

O Papa apareceu por sorpresa; apareceu na cadeira de rodas que xa usaba no pasado polos seus problemas de mobilidade e recibindo osíxeno a través dunhas cánulas nasais.

"Bo domingo a todos. Moitas grazas", foron as súas breves palabras dedicadas aos miles de fieis que asistiran á misa do Xubileu dos Enfermos.

Esta cita, dedicada ao mundo sanitario polo Ano Santo en curso, era especialmente esperada dado que o propio pontífice vive nas súas carnes a enfermidade, aínda que mellora aos poucos, segundo a Santa Sé.

Francisco, de 88 anos, foi hospitalizado o 14 de febreiro por unha pneumonía bilateral que chegou a ameazar a súa vida, aínda que logrou repoñerse e saír do hospital 38 días despois, o 23 de marzo. Desde entón, permanecera illado levando a cabo a súa terapia e a súa fisioterapia respiratoria na Casa Santa Marta do Vaticano.

Emoción na praza vaticana

Os miles de asistentes a misa na praza de San Pedro recibiron o papa Francisco con aplausos, emoción e berros de "viva o Papa!".

Dado o seu estado, o pontífice non puido falar demasiado nin tampouco levar un baño de masas, xa que os médicos lle recomendaron a máxima prudencia e repouso para recuperar a súa saúde.

Ata agora, as misas están sendo celebradas no seu nome por clérigos ou cardeais, que adoitan ler no seu nome os seus discursos e homilías.

Esta eucaristía polo Xubileu dos Enfermos estivo presidida polo arcebispo italiano Rino Fisichella, encargado de pronunciar un texto que o Papa preparara centrándose na necesidade de non excluír os enfermos e as persoas fráxiles da sociedade.

"Non é fácil", recoñece o papa na homilía

"Queridos irmáns e irmás enfermos, neste momento da miña vida comparto moito con vostedes: a experiencia da enfermidade, de sentirnos débiles, de depender dos demais para moitas cousas, de ter necesidade de apoio. Non é sempre fácil, pero é unha escola na que aprendemos cada día a amar e deixarnos amar", confesou.

No texto, o Papa arxentino asegurou que "certamente a enfermidade é unha das probas máis difíciles e duras da vida" pero que "o cuarto do hospital e o leito da enfermidade poden ser lugares onde se escoite a voz do Señor".

Neste sentido, citou o seu antecesor, Bieito XVI, falecido con 95 anos o 31 de decembro de 2022 e que na súa encíclica Spe Salvi (2007) sostivo que "a grandeza da humanidade está determinada esencialmente pola súa relación co sufrimento" e que "unha sociedade que non logra aceptar os que sofren é cruel e inhumana".

"É verdade, afrontar xuntos o sufrimento fainos máis humanos e compartir a dor é unha etapa importante de todo camiño cara á santidade", sentenciou.

Por iso, instou a sociedade a "non relegar o que é fráxil" como, denunciou, "lamentablemente vemos que ás veces adoita facer hoxe un certo tipo de mentalidade".

"Non apartemos a dor dos nosos ambientes. Fagamos máis ben diso unha ocasión para crecer xuntos", emprazou.

Unha vez lida a súa homilía e terminada a misa foi cando Francisco reapareceu ante os miles de fieis na praza, mostrando el mesmo a fraxilidade da enfermidade, perceptible sobre todo no ruído que o osíxeno facía no micrófono que usou para falar.

Unha muller leu despois unha mensaxe no seu nome no que saudaba "con afecto" a todos os participantes na misa do Xubileu dos Enfermos e agradecía "de corazón" as oracións pola súa saúde.

Recursos para a sanidade pública, reclama o pontífice

Despois, a Santa Sé difundiu o texto que tiña preparado para o Angelus dominical, publicado por escrito dada a súa imposibilidade de pronuncialo desde a xanela do Palacio Apostólico.

Na mensaxe aos miles de fieis que ateigaban a praza de San Pedro este domingo, o pontífice  volveu aludir á súa hospitalización e á súa convalecencia, e tamén esixiu melloras para os servizos sanitarios de todo o mundo e para os seus traballadores e pacientes.

"Rezo polos médicos, enfermeiros e traballadores sanitarios, que non sempre teñen as condicións adecuadas para traballar e, ás veces, mesmo son vítimas de agresións. A súa misión non é fácil e debe ser apoiada e respectada", defendeu o pontífice.

A continuación, o Papa expresou o seu desexo de que "se invistan os recursos necesarios para a atención e a investigación, para que os sistemas sanitarios sexan inclusivos e atendan os máis fráxiles e pobres".