Irene Montero acepta liderar unha "candidatura de paz" nas eleccións xerais

A exministra de Igualdade e eurodeputada Irene Montero aceptou liderar unha candidatura ás próximas eleccións xerais que non só inclúa a Podemos senón a todos aqueles sectores da esquerda que están comprometidos en favor da paz e rexeitan a guerra e a escalada militar.

"Este é o momento para comprometerse, pídovos hoxe que asumades comigo a tarefa de levantar unha candidatura de paz, de esperanza e de máis dereitos", subliñou, ao asumir este novo reto e destacar que defender a paz é agora a tarefa máis importante.

Montero respondeu así á proposta que lle fixo a líder de Podemos, Ione Belarra, durante un acto do partido "pola paz e contra o réxime de guerra" no Espazo Downtown, no que Unidas Podemos escenifica o seu rexeitamento ao aumento do gasto militar co que se comprometeu o Goberno de Pedro Sánchez.

Precisamente, o Goberno, este mesmo martes, ten previsto aprobar unha partida de 2.000 millóns de euros para defensa, mediante unha modificación orzamentaria.

"Defendendo a paz estamos a defender outro mundo posible", subliñou Montero, que lle pediu a Sánchez "que non autorice ese roubo de 2.000 millóns ás familias españolas" para entregarllo ao complexo militar.

No seu discurso, Irene Montero preguntouse onde tiña escondido ese diñeiro a ministra de Facenda, María Jesús Montero, lamentando as veces que lles dixeron que non había orzamento para saúde, educación ou políticas feministas.

Ione Belarra, lider de Unidas Podemos, este domingo no acto "Pola Paz e contra o réxeme de guerra", en Madrid. Foto: EFE/Fernándo Villar

Ione Belarra carga contra Sánchez por querer dobrar o gasto en defensa e contra Von der Leyen

Ione Belarra foi tamén moi dura coa posición do executivo sobre o investimento militar e cargou contra Sánchez por querer dobrar o gasto en defensa e contra "a señora da guerra, Ursula von der Leyen" polo seu plan de destinar 800 mil millóns de euros a este capítulo.

"Se queren a guerra que vaian Trump, Putin, Sánchez, Feijóo e von der Leyen", dixo.

A Comisión Europea, reprochou a secretaria xeral de Podemos, propón que "nos armemos ata os dentes" para ir a unha guerra militar que non se vai producir, subliñou, mentres que propoñen ir "en chancas" a unha guerra comercial que xa está aquí e que nos fará máis pobres.

A líder de Unidas Podemos chamou a acabar coa "humillación" dos Estados Unidos, recalcando que o patriotismo se demostra freando o rearmamento, saíndo da OTAN, sacando as bases norteamericanas de chan español e protexendo "con uñas e dentes" os sectores estratéxicos nacionais e os dereitos sociais.

O acto foi presentado polo que fora xefe do Estado Maior da Defensa e secretario xeral de Podemos, José Julio Rodríguez, quen, como militar, afirmou sentirse máis antimilitarista.

Advertiu o militar que non se debe caer na trampa de que aumentar o gasto militar nun 2 ou un 3 por cento do PIB proporciona máis seguridade porque iso empobrece a todos e só enriquece uns poucos.