O Parlamento de Galicia aproba lei para garantir unha cultura inclusiva e accesible

O Parlamento autonómico aprobou esta mañá o ditame elaborado por unha comisión relativo ao proxecto de lei de cultura inclusiva e accesible de Galicia, unha norma aprobada polos deputados do PPdeG, que dispoñen de maioría neste hemiciclo, pero coa abstención dos do BNG e PSdeG.

Na súa intervención, o conselleiro de Cultura, Lingua e Mocidade, José López Campos, incidiu en que o texto aprobado é unha "lei pioneira" que regula por primeira vez a cultura dende a perspectiva da inclusión.

Na súa opinión, a pesar do argumentado polos deputados socialistas e nacionalistas galegos na oposición, tivo unha "resposta extraordinaria" por parte do sector cultural con "máis de 55 reunións" con entidades cuxos representantes "quixeron poñer o seu sinal" na norma.

"Esta lei vai permitir seguir gozando dunha cultura rica, plural, diversa; dunha cultura sen barreiras físicas, sen barreiras cognitivas, e dunha cultura sen barreiras comunicativas, sociais e onde o territorio non condicione o acceso á súa rica cultura", afirmou o conselleiro.

López Campos destacou que, entre outras cousas, o texto normativo hoxe aprobado facilitará a conciliación da cultura coa realidade dos colectivos en risco de exclusión social, profundará na redución da fenda dixital, suprimirá barreiras a creadores e dinamizará a cultura no ámbito rural.

A parlamentaria Silvia Longueira, do PSdeG, cualificou o texto de "inocuo" e "unha declaración de boas intencións", do que "non se pode dicir nada malo" pero que carece de accións "sobre aquilo que pretende", dixo.

Como aspectos polos que a seu entender a norma aprobada é deficitaria, a socialista citou a falta de concreción normativa e de mecanismos de implementación, a ausencia de asignación orzamentaria, as carencias nas perspectivas tecnolóxicas e de ámbito dixital, a escasa atención a colectivos específicos ou a falta de colaboración cos axentes sociais e culturais.

Pola súa banda, a nacionalista galega Mercedes Queixas censurou a intervención da deputada do PPdeG Carmen Pomar, á que criticou que coa súa intervención "non vai conseguir tapar a irrelevancia nin a inconcreción desta lei".

"Poden insistir aquí en palabras de solidariedade e de compromiso co acceso á cultura inclusiva, pero se de verdade preocupáselles ata o de agora a inclusión de todas as persoas xa desenvolverían a lei de inclusión social e a lei de accesibilidade, que foron incapaces de aplicalas en dez anos", criticou Queixas.

A exconselleira de Educación, Carmen Pomar, criticou o BNG e PSdeG, que "tentan buscar nesta norma o que non é para dicir que non está ben feita" e "tentan buscar o que non corresponde regular á mesma para xustificar a súa crítica que a considera incompleta". Criticou as deputadas Queixas e Longueira por pretender comparar ese con outros textos "que nin son norma nin falan de cultura inclusiva", e pediu que "cambien esa actitude e sexan quen de entender, o para quen e o como da norma".

"Non estamos nin ante un plan, nin ante un conxunto de accións, nin ante unha estratexia; trátase de recoller as bases que abren un novo escenario para ir da man dos colectivos da diversidade, desfacendo barreiras e marcando obxectivos para que a cultura sexa cento por cento accesible para todas as persoas e para que a cultura sexa unha ferramenta de expresión para todos e todas, sen exclusión", afirmou.