O Goberno segue negociando cos socios para evitar a derrota na votación do paquete fiscal

O portavoz do PSOE no Congreso, Patxi López, mostrouse este martes convencido de que o Goberno é capaz de deseñar un imposto para as grandes enerxéticas que poidan apoiar á vez Junts e Podemos, con exencións para as compañías que utilicen os seus beneficios para descarbonizar.

Segundo o portavoz socialista, isto é o que está a negociar o Goberno con Podemos para conseguir o seu apoio, ou polo menos a súa abstención, na lei que establece un tipo mínimo impositivo para as grandes empresas e que incorpora parte do paquete fiscal do Executivo.

Unha lei que se votará este xoves no pleno e que Podemos ameaza con tombar se non obtén garantías de que o real decreto lei, no que o Executivo se comprometeu a incluír o gravame ás enerxéticas, sae adiante e non será vetado por Junts.

O argumento co que os socialistas tentan convencer a Podemos é que non se pode tratar igual a unha empresa que reparte todos os seus beneficios entre os accionistas, que a outra que os reinviste para contribuír na descarbonización.

"De aquí ao xoves imos estar negociando ata que soe a campá", sinalou Patxi López, para quen é "compatible" que se prorrogue o gravame ás enerxéticas en 2025, como esixe Podemos e o resto de socios da esquerda, e que as que invisten os seus beneficios en descarbonización estean "exentas" de pagalo, como esixe Junts.

Os socialistas confían na negociación para salvar todo o paquete fiscal

A Comisión de Facenda embarullouse tanto que, por momentos, aos deputados custáballes entender que se estaba votando. Suspendeuse catro horas ata que, contra a unha da pasada madrugada, o ditame quedaba aprobado.

O Goberno salvaba así o primeiro trámite dunha lei que, orixinalmente, debe servir para cumprir con Bruxelas impondo ás multinacionais un tipo mínimo do 15 %.

O que non se salvou nesa votación foi a maior parte do paquete fiscal que incluíu nas emendas, aínda que si gañou tempo pactando a dúas bandas.

Por un lado, comprometeuse con Junts a manter fóra desta lei o imposto ás eléctricas. Polo outro, prometeulle a ERC, EH Bildu e BNG prorrogalo un ano máis a través dun real decreto que Junts, xa avisa, vai tombar votando en contra.

Para Podemos toda esta negociación é "unha tomadura de pelo" e insisten en que votarán en contra se non aparece na lei esa prórroga.

O socio da coalición, Sumar, empeza a asumir a derrota. A súa voceira Aina Vidal recoñece que "a día de hoxe, que a reforma fiscal queda, ou vai quedar pendente".

Pero os socialistas piden "confianza" na negociación. "Estamos a martes, paso a paso", dixo Pilar Alegría na conferencia de prensa posterior ao Consello de Ministros, ao tempo que tamén recoñece que "negociar cuestións fiscais non é sinxelo".

Para o líder dos populares, Alberto Núñez Feijóo, estamos ante "un completo colapso" e "unha agonía lexislativa que vimos onte no caos da Comisión de Facenda".

Un caos que ameaza con repetirse no pleno do próximo xoves cando volverán votarse todas esas medidas fiscais.