Morre un operario que facía labores forestais en Cerdedo-Cotobade
Morre un operario que facía labores forestais en Cerdedo-Cotobade
O falecido tiña 47 anos
Quedou inconsciente cando estaba subido a unha árbore
Un home de 47 anos faleceu este martes mentres realizaba unha serie de labores forestais nun monte do concello pontevedrés de Cerdedo-Cotobade. O suceso rexistrouse no lugar de Aguasantas.
A vítima quedou inconsciente cando se atopaba subido a unha árbore. Os seus compañeiros lograron baixalo ao chan antes de que chegasen os servizos de emerxencia, que tiveron dificultades para chegar ata a zona, que era de difícil acceso.
Desde a central do 112 Galicia solicitaron a intervención de Urxencias Sanitarias de Galicia-061, que enviou o helicóptero medicalizado con base en Santiago; así como da Garda Civil e dos voluntarios de Protección Civil de Cerdedo-Cotobade.
Foron estes últimos os que advertiron que o acceso á vítima era complexo e que sería necesario empregar medios adicionais para trasladala ata os vehículos medicalizados.
A pesar dos esforzos realizados, o equipo sanitario só puido confirmar o falecemento do home, veciño de Viascón, en Cerdedo-Cotobade, e que traballaba no sector da poda.
