Expulsado do Poio o xogador que agrediu o delegado do Cotobade nun partido de Terceira Futgal

Brutal agresión no partido de terceira rexional que disputaron o Cotobade e o Poio. Un xogador non convocado do equipo visitante invadiu o campo e propinoulle un puñazo ao delegado do Cotobade, que tivo que ser trasladado a un hospital. O agresor xa foi expulsado do seu club, que condenou os feitos.

Sucedeu no campo das Extremas, en Cotobade. A piques de rematar o encontro de Terceira Futgal que enfrontaba o equipo local contra o Poio comezou unha liorta na bancada que acabou no campo de xogo

Óscar Pinto, presidente do CED Cotobade, conta o acontecido: "No minuto 89 unha señora do Poio empezou a increpar un pouco o publico na bancada. O noso porteiro suplente aplaudiulle desde o terreo de xogo porque miraba que a señora se estaba equivocando. Ela entra no terreo de xogo e o marido proporciónalle unha labazada ao noso porteiro suplente".

O presidente explicou que a continuación "o seu delegado intenta parar un pouco a avalancha deses afeccionados dentro do campo" e entón "proporciónanlle co puño pechado un golpe en toda a cara".

O delegado tivo que ser trasladado a un centro hospitalario e o Cotobade presentou denuncia dos feitos ante a Garda Civil. Dáse a circunstancia de que o agresor era un xogador do Poio non convocado no partido e que estaba na bancada.

Ao día seguinte, o presidente do Cotobade recibiu unha chamada do Poio na que lle pediron desculpas e lle informaron de que o xogador ía ser expulsado do club.

Os dous equipos condenaron enerxicamente uns actos violentos que cualificaron de intolerables. Nun comunicado o Poio confirmou a expulsión do seu xogador e púxose a disposición do Cotobade e da persoa agredida.