En estado grave un veciño de Carballo que recibiu unha coitelada no tórax
En estado grave un veciño de Carballo que recibiu unha coitelada no tórax
A Garda Civil detivo un mozo de 18 anos como presunto agresor
Un veciño de Cances Grande, en Carballo, permanece grave no Complexo Hospitalario da Coruña, onde ingresou o venres logo de recibir unha coitelada no tórax. A Garda Civil detivo o presunto agresor, un mozo de dezaoito anos que se trasladou á aldea hai apenas dous meses para vivir co seu pai.
Na aldea hai hermetismo arredor do suceso. A Garda Civil continúa investigando sobre o terreo, buscando sinais, pegadas que permitan artellar o relato dos feitos. Na tarde do sábado, a Policía Xudicial reconstruíu os pasos do presunto agresor na súa fuxida e volveu examinar a casa de Manuel, o home de 79 anos que quedou gravemente ferido.
Sobre as oito da tarde do venres, varias testemuñas víronos forcexando no chan neste punto. O veciño que intentou separalos reparou en que había moito sangue e inmediatamente chamou a emerxencias e alertou as autoridades.
Os sanitarios desprazados conseguiron estabilizar e monitorizar o ancián, que ingresou no CHUAC en estado crítico cunha ferida por arma branca no tórax. O mozo que presuntamente o acoitelou foi localizado e detido pouco despois preto do lugar, na casa do pai. Foi trasladado ao hospital con cortes nas mans. Apenas leva dous meses vivindo en Cances e pouco saben del os seus veciños, aínda que na aldea aseguran que ten problemas de saúde mental.
Polo momento descoñécese cal foi o detonante deste caso, sobre o que a veciñanza prefire gardar un silencio prudente.
