O parlamento israelí prohíbelle á axencia da ONU que atende refuxiados palestinos operar no país

A Knesset (Parlamento israelí) aprobou este luns unha lei que prohibe á axencia da ONU para os refuxiados palestinos (UNRWA), que presta servizos sociais a millóns de palestinos refuxiados e os seus descendentes, operar en territorio israelí, incluído o anexionado de forma unilateral Xerusalén Leste.

A proposta de lei, que xa se aprobou en primeira lectura no verán antes do receso parlamentario de tres meses, saíu adiante este luns en segunda e terceira lectura con 92 votos a favor e 10 en contra, no primeiro día do novo período de sesións.

O texto estipula que a UNRWA non realizará ningunha representación, non prestará ningún servizo nin realizará ningunha actividade "directa ou indirectamente" dentro do territorio soberano de Israel.

Incluso os deputados de varios partidos da oposición, incluídos Yesh Atid (Hai un Futuro) do centrista Yair Lapid ou Unidade Nacional de Benny Gantz votaron a favor desta prohibición, que á súa vez reducirá severamente as actividades da UNRWA en Gaza e a Cisxordania ocupada, dada a dependencia de coordinación coas autoridades israelís.

Momentos antes da votación, o deputado da formación árabe Hadash-Taal, Ahmad Tibi, cualificou esta lexislación de "fascista" durante un debate no pleno da Knesset, o cal provocou os berros e o enfado da deputada do Likud, Tally Gotliv, que tivo que ser agarrada e levada de volta ao seu sitio.

Un segundo proxecto, que debe ser votado proximamente, busca revogar a exención fiscal e o status de inmunidade da axencia e designala como unha "organización terrorista" polos seus suposto vínculos con Hamas.

A UNRWA proporciona actualmente servizos como educación e saúde nalgúns dos campos de refuxiados de Xerusalén Leste, como o de Shuafat. Ademais, sen a coordinación con Israel, seralle moi difícil poder traballar en Gaza ou Cisxordania, onde se encarga da distribución de axuda, debido á falta de visados ou permisos de entrada a eses territorios palestinos ocupados.

A UNRWA é "a columna vertebral das operacións humanitarias en Gaza", dixo Jonathan Fowdler, un dos voceiros do organismo, quen destacou que sen o traballo da axencia, 660.000 nenos gazatís perderían á única entidade capaz de continuar coa súa educación.

Outra lei prohibe a calquera entidade ter contacto coa UNRWA

 A Knesset aprobou ademais unha segunda lei que busca restrinxir a capacidade de actuación da axencia da ONU para os refuxiados palestinos (UNRWA) nos territorios palestinos ocupados de Cisxordania e Gaza, ao prohibir a calquera axencia gobernamental ou entidade pública ter contacto con esta axencia ou os seus empregados.

Esta votación foi aprobada polos lexisladores israelís con 87 votos a favor e 9 en contra, a pesar da oposición internacional tanto dos Estados Unidos como da Unión Europea. 

Esta lei, que prohibe a calquera funcionario israelí establecer contacto coa UNRWA, impedirá que a axencia da ONU poida seguir desenvolvendo os seus labores educativos e sanitarias nos territorios palestinos ocupados, xa que Israel non emitirá permisos de entrada nin facilitará a coordinación co exército.

"Esta lexislación ameaza un salvavidas vital para máis de 2,5 millóns de refuxiados palestinos en todo o territorio palestino ocupado. Representa un intento deliberado de socavar fundamentalmente a UNRWA e a súa misión esencial de apoiar o socorro, a educación e o desenvolvemento humano dos refuxiados palestinos", denunciou a organización legal palestina Adalah tras coñecérense as dúas votacións.

 A UNRWA foi establecida en 1950 pola ONU e presta servizos sociais a máis de cinco millóns de refuxiados palestinos, moitos descendentes dos centos de miles de desprazados pola creación do Estado de Israel, que viven agora na Franxa de Gaza, Cisxordania, Líbano, Siria e Xordania.

Acusacións inconclusas

Israel acusou a UNRWA de empregar 2.100 membros de Hamas, e en xaneiro dixo que doce deles participaran activamente nos letais ataques do 7 de outubro, ao que a axencia respondeu de inmediato abrindo unha investigación interna e despedindo eses traballadores.

A axencia, que conta con máis de 30.000 empregados, asegurou meses despois que Israel non presentara probas concluíntes sobre a implicación destes traballadores nos atentados, mentres que unha investigación independente, a cargo da exministra francesa de Exteriores Catherine Colonna, avalou en marzo a neutralidade da actividade humanitaria da axencia, aínda que detectou «áreas críticas».

En canto Israel verteu tales acusacións en xaneiro, 18 países anunciaron que retiraban os seus fondos, incluídos os seus principais doantes: Estados Unidos, Alemaña, Xapón ou Francia. Iso supuxo un recorte do orzamento de 450 millóns de dólares en plena resposta de emerxencia na Franxa de Gaza.

A maioría de países, incluídos O Canadá, Suecia, Australia ou a propia Unión Europea, retomaron meses despois o financiamento á UNRWA ante a falta de probas de Israel.