España perde máis de 193.000 afiliados, a maior caída en agosto en cinco anos

A Seguridade Social perdeu 193.704 afiliados en agosto mentres que o paro subiu en 21.884 persoas nun comportamento habitual para o mercado laboral neste mes coa parada dalgunhas actividades e o final da tempada alta de verán.

Segundo os datos facilitados este martes polo Ministerio de Inclusión, Seguridade Social e Migracións, o descenso de agosto, liderado pola educación e en liña co de anos anteriores, deixa o total de afiliados en termos medios en 21,18 millóns.

En canto ao número de desempregados, aumentou en 21.884 persoas, ata os 2.572.121, manténdose así en mínimos de 2008 e marcando o menor aumento nun mes de agosto desde 2021, cando caeu por efecto da pandemia, segundo datos facilitados polo Ministerio de Traballo.

Os mellores datos da serie histórica en Galicia nun mes de agosto

Galicia perdeu en agosto 487 afiliados á Seguridade Social, apenas un 0,04 %, o cal deixa o número total en 1.092.886 persoas. O paro aumentou en 633 persoas, un 0,54 %, ata as 118.678 persoas. Respecto aos datos anuais, o paro baixa na comunidade autónoma un 7,08 %, máis de 9.000 persoas, por encima da media, que queda no 4,83 %.

O conselleiro de Emprego, Comercio e Emigración José González, subliña que, malia todo, trátase da cifra de paro máis baixa da serie histórica nun mes de agosto, e que os datos son mellores cos da media española.

 

O paro aumentou en Galicia en agosto en todas as provincias, máis en termos absolutos na Coruña (329 persoas) e en termos relativos en Ourense, un 0,94 %.

Por sectores, de novo os servizos seguen marcando a tendencia de aumento ou descenso do paro na comunidade autónoma, neste caso á alza. En agosto 578 persoas deste sector máis outras 153 da industria tiraron cara a arriba do indicador, mentres que a agricultura (-86) e a construción (-13) mitigaron a alza do desemprego.

Descenso de afiliacións en España

Nos datos referentes ao conxunto de España, o descenso de afiliacións en agosto está liderado pola educación, que perde 72.338 afiliados polo fin de actividades académicas que se estenden en xullo.

Xunto á educación, caeu a afiliación en construción, con 19.060 ocupados menos; industria, con 17.373; actividades administrativas e servizos auxiliares, con 16.969 menos, e actividades artísticas, recreativas e de entretemento, cun descenso de 14.868.

Tamén se resentiu o sistema especial agrario, con 14.741 afiliados menos, e o de autónomos, que perdeu 10.135.

A afiliación baixou algo máis entre as mulleres, 98.765 ocupadas menos ata os 9,9 millóns, que entre os homes, con 94.938 ocupados menos e 11,2 millóns en total.

Sobe o paro no sector servizos

En canto ao número de desempregados, aumentou en 21.884 persoas, ata os 2,57 millóns, manténdose así en mínimos de 2008 e marcando o menor aumento nun mes de agosto desde 2021, cando caeu por efecto da pandemia, segundo datos facilitados polo Ministerio de Traballo.

Na comparativa interanual, o paro reduciuse en 130.579 persoas (a un ritmo do 4,8 %), en tanto que o emprego suma 482.902 afiliados máis ca hai un ano. O secretario de Estado de Traballo, Joaquín Pérez, valoraba o aumento da estabilidade no emprego.

Por sectores económicos, aumentou con máis forza o número de desempregados procedentes do sector servizos (20.189), seguidos polos da construción (4.187) e a industria (2.995).

Pola contra, diminuíu o número de desempregados da agricultura, en 2.337 persoas, e entre o colectivo sen emprego anterior, en 3.150 persoas.

Pola súa banda, o desemprego dos mozos menores de 25 anos ascende en 2.186 persoas, ata un total de 177.112, e acumula corenta meses consecutivos de caídas interanuais marcando a cifra máis baixa da serie nun mes de agosto.

Por rexións, o desemprego baixa en Canarias (443), Estremadura (365) e A Rioxa (130) e Cantabria (28), e tamén na cidade autónoma de Ceuta (108), en tanto que aumenta no resto, empezando por Cataluña (8.707), Comunidade Valenciana (3.459) e País Vasco (3.298).

En agosto, o número de contratos rexistrados foi de 1.040.159, un descenso de 48.672 respecto ao mesmo mes de 2023, dos que preto do 40 % foron indefinidos (389.735, 29.192 menos).

O case 60 % restante, uns 650.424 contratos, foron temporais, unha cifra que tamén se reduciu en 19.480 respecto a un ano antes.