O partido de centrodereita GERB gaña as sétimas eleccións de Bulgaria, pero terao difícil para formar goberno

Os primeiros resultados parciais das eleccións xerais do domingo en Bulgaria, as sétimas desde 2021, confirman a vitoria do partido conservador populista GERB, que, con todo, terao novamente moi difícil para formar unha coalición de goberno.

Tras o escrutinio do 82 % dos votos, o partido do exprimeiro ministro Boiko Borisov fíxose cun 26 % dos votos, informou este luns a Comisión Central Electoral.

Ségueo a coalición reformista e europeísta PP-BD, con 14,7 %, e o partido ultranacionalista e prorruso Resurrección, co 13,8 %. En total, entraron no Parlamento, de 240 escanos, nove formacións, ao superaren outros cinco partidos o limiar do 4 % necesario.