PP e PSdeG rexeitan a iniciativa popular para corrixir o Himno de Galicia e optan por crear unha comisión de estudo

Os votos en contra de PPdeG e PSdeG tombaron a iniciativa lexislativa popular para restaurar o texto "fidedigno" do himno galego, apoiada só polo BNG no pleno do Parlamento, e propoñen a cambio a creación dunha comisión de estudo para volver iniciar este proceso de posible rectificación da letra.

Os dous partidos mostráronse de acordo en que o texto pode conter "non poucas erratas", tal e como indicou o propio autor da letra Eduardo Pondal en 1913, e consideran que é necesario un "amplo consenso social" máis que "filolóxico" para corrixir eses erros e pediron que o seu voto negativo non se interprete "como un non" para rectificalo.

O profesor Manuel Ferreiro Fernández, autor do estudo en que se basea esta iniciativa e encargado de defendela ante o pleno do Parlamento, lamentou a negativa destes dous partidos a admitir a trámite unha iniciativa popular avalada por case 16.000 firmas e advertiu de que xa son moitos anos "para seguir cun himno que non responde á vontade de Pondal". Segundo lembrou, desde o primeiro intento en 1996 xa se realizaron varios no Parlamento para recuperar o texto orixinal e agora, 27 anos despois, tratábase de decidir entre "deixar o texto deturpado incorrecto, mesmo parcialmente falso ou optar pola verdade e recuperar o texto certo" escrito por Pondal.

Entre eses cambios propostos para a letra do himno está que a terceira estrofa sexa "más sós os ignorantes e férridos e duros", en lugar de "iñorantes" e "féridos"; ou na segunda cambiar "chan" por "clan" no verso "confín dos verdes castros e valeroso clan", cuestións atribuídas a erros tipográficos ou doutro tipo cometidos na primeira impresión oficial do texto na Habana.

Desde o BNG, a deputada Mercedes Queixas argumentou que "non debe haber máis demoras" nesta cuestión e instou a PPdeG e PSdeG a "non pechar a porta" a unha iniciativa popular porque só é necesaria "vontade política" para admitila a trámite e continuar o proceso para a modificación do himno.

Desde o PP, o seu portavoz Alberto Pazos coincidiu co PSdeG en que é "mellor instrumento" unha comisión de estudo no Parlamento non como "punto final" á iniciativa popular, senón para "tramitala con máis garantías", e pediu a todos os grupos asinar unha solicitude conxunta para crear este órgano parlamentario.

A deputada do PSdeG Noa Díaz apuntou, pola súa banda, que o debate sobre o texto o himno está "aínda aberto", polos informes elaborados hai anos pola Real Academia Galega ou o Consello da Cultura Galega que manifestaron "dúbidas" sobre a modificación do texto do himno. E explicou que unha comisión de estudo, a diferenza da iniciativa popular que se tramitaría como un proxecto de lei no que o proceso de consulta "non sería previo", servirá para "dilucidar a conveniencia" dos cambios propostos, así que pediu que non se tome o voto do seu partido "como un non, senón como o inicio dun camiño definitivo" para corrixir o himno.